• Breaking News

    VC thuneihna

    Municipal Area pawn lamah chuan Village Council hi khawtlang roreltu leh thuneitu ber an ni a. Khawtlang mipui ten kan thlan tlin an nih avangin anmahni mimal chu lehkhathiamlo emaw, rethei tak emaw pawh nise an Village huam chhungah roreltu an ni a. An thuneihna a sang tho a ni.
    Mipui thenkhat chuan VC te thuneihna hi kan hre lo a nih hmel. Kan thiantha te; NGO lama kan thawhpui emaw Kohhran lama kan rawngbawlpui pawh nise VC Member an nih chuan mipui vantlang chunglam an ni a. Zah leh hawihhawm tak dawnsawn tur an ni.

    NGO Committe-na ah pakhat chuan ‘VC te hi ko ve ila; anmahni nen rel ila...’ tih rawtna a siam a. Member pakhat chuan ‘VC te chu NGO ten kan koh mai mai tur an ni hleinem, tul an tih chuan anmahni zawkin min ko ang chu...’ tiin a chhang a. Dik pawh a dik zawk. Association pakhat chuan an Committee thurel chu VC te hnenah a hriattir a; VC te pawhin lehkha an lo dawng ngei a. Mahse a nihna takah chuan VC te chu thuneitu an nih angin hriattir lovin ngen / dil se a duhawm zawk.

    Tun hnai-ah hian Sawrkar Deptt thenkhat chuan VC te hi tirh an ching thar riau lehnghal a. Anmahni ngei khua-a an rawn kal a; data leh thildang report an dawn khawm tur te pawh VC te kutah rawn dahin an rawn tih tir fo mai a. VC te an fel hrim hrim a; tha takin an lo tih sak leh mai thin pawh a, a nihna takah chuan Deptt hian VC te hi an tih tur tihsak turin an tir fo tur a ni lo a; anmahni an rawn tih huna lo hriatpui tur leh lo tanpui erawh thil tha leh duhawm tak a ni. Sawrkar lama kal tur leh report ngai VC ah mipui ten kan report a; Deptt Staff te tih tur zawng zawng VC ten an ti a; kan khawtlang roreltu kan thlan tlin te kha Peon ang deuhin an ngai ni hialin a lang.

    Mipui enkawltu VC te hi District Administrator te hian an thuneihna a sang tih an hrechiang bawk a; an namnul mai mai ngai lo. VC te ngaihdan leh thlir dan hre lo phei chuan DC te SDO(C) te hian thutlukna lian tham an siam ngai mang lo. Chutiang khawpa thuneihna pawimawh nei chu an ni.

    In hmun leh lo ram chungchang ah pawh VC te pawmpuina Seal a awm loh chuan eng chen mah a thlen theih loh. Mi thiltithei ten VC lo kal kan tum pawh nise a tawp-ah chuan buaina a awm a; cancell a ngai leh tho thin.

    VC hi kan chunga roreltu anih kan hriat fiah a; an thu kan zawm thiam hun hun ah khawtlang inrelbawlna a kal dik ang. Vantlang kawng leh hmunhma a lo chep tial tial a; a bul hnaia Huan pal te pawh a lo insawn hret hret a. Hetiang hun-ah pawh hian VC te thu leh ngaihdan zawm thei ila. Mi thenkhat hi chuan LSC aia zau hret hauh kan ching bawk nen, zah pah lo taka khawtlang roreltu anchhia lawh mai duh te pawh kan la awm. Kan hriat tlem vang a ni zawk.

    VC te hi NGO-a hruaitu ang an ni lo a; Kohhran Upa ang an ni lo a; khawtlang roreltu an ni tih hi kan hriat fo tur a ni. Chu chu kan hriatfiah hun hun ah khawtlang rorelna-ah hmasawnna a tam lehzual ang.

    No comments

    Post Top Ad

    Post Bottom Ad