• Breaking News

    Tui kan nghei chhan kha

    Chawlhkar 2/3 kal ta lamah khan Tuitun atanga tui lak ringtute chuan tui kan dawng mumal lo a; chhungkaw thenkhat phei chuan kum 10 deuhthaw an lo kalsan tawh Tuikhur tui chawi leh tuikhur insuk te an tih thar leh a ngai a. Chhungkua kan buai hman teuh hle a ni.

    Tuitun ah chuan nitin darkar tin tui a luang reng a; mahse pump theih a ni lo. Pump theih anih loh chhan pawh Tui Pump-na khawl tinungtu tur Power line a chhiat vang a ni a. Power a thleng thei lo a ni. PHE in theih tawp chhuahin power line chhiar siam tum mahse ni hnih khat lekah an zo mai si lo a; ruah leh thli a lo thawk chhunzawm si a; chuvangin mipui ten tui kan nghei nasa hle anih kha.

    Mipui hnena tui inpek hi Sawrkar laipui chuan khaihlak awm a remti miah lo a. Union Ministry in estimate leh proposal a siam-ah pawh Power supply khaihlak vang mai mai a mipui in tui an nghei tur chu a rem tih loh avangin Diesel khawl an dah tel zel thin. A chhan chu tui hi nitina kan mamawh a nih avangin khaihlak thiang a ni lo a. Mipui chawmtu tur Water Supply Scheme an siamna hmun apiangah khaih lak changa thlaktu tur khawl pahnih hman theih a awm zel thin.

    Kawnpui Pump House ah pawh Electric Khawl leh Diesel khawl a awm kawp ve ve a; mahse Diesel khawl zawk hi a chhiatna a rei tawh niin thawktuten an sawi a. Siam that a la ni lo fo a niang. Hun kalta lamah pawh khan Diesel khawl te; Electric khawl te hi a lo chhe zeuh zeuh tawh a; mahse Deptt SDO leh EE ten an ngai mawh thin em a; a chhiat chang chuan mithiam kovin an phi ruai thin a; a chhiat rei ngai loh avangin mipui-ah harsatna a thleng hman vak lo a; hriat pawh kan hre vak lo. Mahse tun hnaiah khawl pahnih hmanga Tui Pump theih loh anih khan mipui min nghawng ta deuh a ni.

    Fur ruah tui leh Thli a lo la thleng dawn chauh a; kan duh thu ni hauh lo-ah Power Supply khaihlak chang a la awm mai thei a ni. Chutiang hunah chuan Diesel khawl hi mipui hnena tui pek tur Pump nana hman tur a ni a. Chuvangin a chhia anih pawhin hun kal tawh ang khan siam tir thuai a ngai.

    Diesel khawl chhe rei tawh hi Deptt lama kan thawktu SDO leh EE ten hna dang an ngah deuh a; an buaipui hman lo anih pawhin mipui min enkawltu Village Council ten Deptt hotu lian zawk hnenah an thlen thuai a tha hle. CE emaw EnC hnenah emaw he harsatna hi thlen a hun tawh a ni. Power line pawh a chhe leh thut thei a; Electrict khawl pawh a chhe thut thei bawk a; chutiang hun ah chuan Diesel Khawl hi hman theiha a awm ngei ngei a ngai a ni.

    Helaia PHE Deptt a thawktu JE, SA leh MR ringawt te tan chuan Tui pump khawl chhia hi siam a harsa deuh a ni ang. An hotute hnenah pawh thlen se a aia sang zawk leh thuneitu sang zawk hnen thlen a ngai pawh a ni mai thei. Deptt thawktute chuan an theih tawk an ti mek ang a; VC ten emaw thuneitu sang zawk hnena kan thlen a tul tawh hle a ni.

    No comments

    Post Top Ad

    Post Bottom Ad