• Breaking News

    THLIPUIIN CHENNA IN 68 TICHHIA

    Nimin zinga Kolasib leh Vairengte leh a chhehvel khua-a thlipui nasa tak tlehin Chenna In 68 a tih chhia a, Power line leh ban engemaw zat a tichhe bawk.

    Disaster Management & Rehabilitation Branch, Kolasib DC Office chhinchhiah danin nimin thlipui tleh avanga In chhia zawng zawng hi In 68 a ni a, Kolasib-ah In pakhat tichhiain a bak zawng chu Vairengte leh a chhehvel khua-a In te an ni hlawm. In 68 zingah hian In 33 luah zui tlak loh khawpin a chhia a ni.

    Thlipuiin In a tihchhiat bakah hian thing leh electric ban tlu avangin hun engemaw chen kawngpui te pawh danchah a ni a, power line a chhiatna hmunah te chuan nizan he chanchin buatsaih lai thleng pawh khan eng an la nei lova, inbiakpawhna lamah pawh eng emaw chen chu a buai phah a ni.

    DMR chhinchhiah danin In chhia hi Kolasib, Saihapui ‘K’, Bilkhawthlir North leh South-ah In 1 \heuh, Saiphai-ah In 10, Saipum-ah In 20, Phaisen-ah In 4, Vairengte-ah In 30 (Vairengte II-ah 18 leh Vairengte III-ah 12) te a ni.

    Heng In chhia zingah hian Sawrkar Building 1 - Vairengte SDPO Quarters leh Kohhran Building 2 - UPC (NEI) Biak In, Vairengte leh UPC (Mz) Biak In, Kolasib ami te a tel a ni. He’ng bakah hian Bilkhawthlir North leh Phainuam-ah Kuhva kung 698 a tichhe bawk a ni.

    He chhiat tawh avang hian Vairengte Joint VC leh Joint YMA te hmalaknain nimin khan khawtlang huap chhawmdawl hnatlang koh nghal a ni a, Vairengte SDO (C) Pu Isaac Lalrempuia chuan chhiattawhna hmun te fangkualin, chhawmdawl hna thawh dan tur a en a, Bialtu MLA Pu Lalrinsanga pawh chhawmdawl dan enin nimin khan Vairengte-ah hian a thleng thla ve nghal a ni.

    Heng khuaa mi thenkhat te chuan tukina thli tleh hi kum 40 chhunga a nat ber tum nia an hriat thu an sawi a, kawng sira Two Wheeler dah pawh a chhem tlu nual a ni.






    No comments

    Post Top Ad

    Post Bottom Ad