• Breaking News

    Ngilneihna lantir

    Sakap thei leh Sa lu hawn thei kan ngaihsan hun kha chu hmanlai a ni tawh a. Tunah chuan Sa kaptu te pawh hi an inthup nasa tawh a, Sa an kah thu mi-in an hria ang tih an hlau ngawih ngawih tawh a ni. Hmanlai kha chuan Sa an kap a; Hlado an chham a, intihtheih nan tlang an tlir anih kha. Mahse vawiin chuan Ramsa te hi khawngaih leh lainat tur an nihzia kan hre tawh a; Silai nei duh pawh an awm tawh mang lo.

    Thla kalta khan Sairang mipa naupang chuan Cycle-in Arte a chil hlum palh a; Damdawi In ah Arte chu hruaiin Doctor ten an lo tih dam theih mai a beisei a, chu thlalak chu Mizoram chauh ni lo khawvel-ah a darh chhuak a, zan khat thil thu-a Thlalak darh nasa ber leh mi en hlawh ber leh thawnkual nasat ber a ni. He thu hian Khawvel Media lian tam tak a luah a. Europe leh America te; China ram chanchinbu thlengin an chhuah bawk.

    Khatiang taka a darh nasat chhan chu eng dang vang a ni lo. Lainatna leh ngilneihna a lan tir vang a ni mai. Chu chu khawvel mipui tam zawk hian kan ngaina tawh zawk. Kan thlang lawk Assam ram-ah khuan Samak Ki pakhat nei chu Kaziranga Sanctuary ah a tam viau a; a Ki pawh a to tham a, chuvangin mi thenkhat chuan an kap ru nasa hle. Samak kah hi thil harsa tak a ni. Arte thi Damdawi In a hruai aiin Samak kah a harsa zawk, mahse Samak kaptu chu tumahin kan ngaisang lo a; Jail-ah khung se tih rilru kan pu vek zawk. A chhan chu Ramsa chunga lainatna lan tir leh ngilneihna lan tir hi mipui rilru hnehna a nih zawk vang a ni.

    Niminpiah lawkah Bilkhawthlir ah Saza hliam hmuh a ni a; hmanlai kha chu la ni sela; a hmu hmasatu khan a va sat hlum ang a, vannei inti takin a hawn ang. Mahse kha Saza kha tuman tihnat an lo tum hauh lo a; a hliam an enkawl a; sum leh pai sengin Damdawi nen an lo tanpui zawk anih kha. Chu chu mipui rilru a ni tawh zawk. Kha Saza kha tu emaw khan lo tihlumin a sa lo ei ta sela, mi zawng zawngin thiam kan chantir hauh lo ang a; kan chawimawi hek lo ang.

    Kan khua min hual hian ram ngaw tha tak a la awm a; heng hmun te hi Sava leh Ramsa te chenna nuam tak a ni. Kah tuma veh fo aiin anmahni nena thlamuang taka chenho a nuam zawk ang. Thlabar taka va siam a, kah tumtu hian ngaihsan a hlawh tawh lo. A hnung lam atangin mi ten an sawi sep sep tawh zawk. Silai neitute hian mipui rilru a inthlak tawh a; an Silai te pawh an dah bo a hun tawh inhria sela a duhawm hle.

    Mipui rilru a inher danglam zel ang a, nakin ah phei chuan Sapeltu chu beih let duh mai na thinlung te pawh kan la pu hial ang. Kan thil thlir dan a inthlak chak em mai a; Ramvakmite an insiamrem ve thei lo anih chuan lunghnur leh thinrimru teuh in an la in sawh tau titih zel dawn niin a lang. Vawiin-ah pawh hian mipui ten Vote thlak ta ila; Sapelmi ngaisanglotu hi 95% aiin kan tam tawh ang. Thenkhat phei chu an Sa kah ei tura an sawmna ah pawh an kal duh lo hial tawh a ni.

    Sava leh Ramsa te hi ram hnuai-ah thlamuang taka an awm hian an hmuhnawm ber a, an thih tawh chuan an mawina a awm tawh lo.

    No comments

    Post Top Ad

    Post Bottom Ad