• Breaking News

    Motor ruk chingte Kolasib PS-ah thu zawtfiah; Mizo pakhat a tel ve

    Central YMA hnuaia SRS ten tunhnaia Khamrang bula an man Motor ruk ching nia hriat hnamdang 6 leh an thurualpui Kolasib Vengthara cheng thin Zoremmawia, tuna Zuangtui (Muthi road)-a cheng, Horticulture department-a driver hna chelh lai te chu Police ten Kolasib-ah an la thla a, nimin khan medical niin nizan atang khan thu zawhfiah (interrogation) an ni.

    Heng Lirthei ruk hmang nia sawite hi SRS te chuan an thudawn bawhzuia an chhuina kal zelah kar hmasa Ningani zan khan Khamrang bulah man niin Kawnpui PS-ah hruai an nih hnuin Aizawl lamah SRS te hian an hruai chho a, heng mite ka a\ang hian Pu R Lalhmangaih-sanga, Kolasib Vengthar te Tata truck (207) thar, April 16 zana bo chu an ruk ngei a ni tih hriat a nih hnuah an thubuai hi chhuizui turin Kolasib-ah lakthlak zui leh an ni.

    An mi man te hi Sakin Uddin Borming s/o Rafik Uddin Silchar, Nurallah Majumder s/o Fazul Majumder, Silchar, Shamir Uddin Ahmed s/o Samir Ali, Karimganj, Abdul Aman s/o Kamir Ali, Silchar, Hussein Ahmed Lasker s/o Zabet Ali, Silchar leh Begu Sharma s/o Bimal Sharma te an ni a, anni bakah hian Lirthei hralhna kawnga lo pui thintu Zoremmawia pawh man tel a ni.

    Pu R Lalhmangaih-sanga te Tata truck hi nikum December thlaa an lei kha niin Kolasib DTO-ah an registration Number chu MZ05 A4068 a ni a, February thla kha High Security Plate pawh vuah sak niin rukbo a nih hnuah MZ04 A1058 tiin lehkha hmangin registration number dang bel a ni.

    Kolasib SDPO Pu C Lalmalsawma chuan registration number te chu a tak a nih leh nih loh hriat a tul thu te, a tak a nih chuan DTO lam fel loh a nih theih thu te bakah a ru botute pawhin motor thar a nih avangin tualchhungah midang hriat lohva ual-au taka an tlan theihna turin a lem an bel mai pawh a nih theih thu a sawi a ni.

    No comments

    Post Top Ad

    Post Bottom Ad