• Breaking News

    Mibo zawn hnatlang

    Kan khawtlang ah Hmeichhe Tleirawl pakhat chu karkhat vel zet a awmna chin a chhungten an hriat loh avangin khawtlang mipui ten an zawng a. Nimin Pathianni-ah phei chuan thawk chhuak an tam a; lirthei thawh chhuahpui pawh an tam. Kar khat vel zet mahni hna pawh thawk thei lo; hah pawh sawi lova Banglaveng YMA Branch hruaitute chetvelna kha fak an phu hle a ni.

     Mibo zawngtute kha mahni insengso vek an ni a; Pathianni Inkhawm pawimawh tak pawh kal sana midang harsatna tanpuitu an ni. A bik takin hetiang hunah hian Motor thawh chhuah pui thin Motor neitute hi fak an chakawm lehzual.

    Tun tuma kan mibo zawn tak kha, Hmeichhe Tleirawl mai a la nih avangin mipui ten Social Media lama tih chhuah dan tawk leh sawi awm tawk kan hre thiam ta hle mai a. Hmasawnna ropui tak a ni. Kum tlemte kalta ah kha chuan kan hriat zawng zawng, kan rin dan leh ngaihdan thlengin Social media ah hian kan sawi ta mai thin a. Khatiang thu kha kan hre reng bawk si a; a pawi nachen a awm thin a ni.

    Mizo kan nihna leh kan tualzal nun hi tlachhe viau in sawi thin mah ila, tlawmngaih chhuah a hun ah chuan tlawmngai thei kan lo la tam hle. Tangkaina nei lo nia inhriat vanga thawh chhuah loh ai chuan kan theih tawka kan tih kha a hlu em em a ni.

    Mibo zawn thu hi kan hre ta zeuh zeuh a. Eng vang pawhin bo sela; tumah zawn lohin kan ngawihsan ngai lo. Thenkhat chu rilru buai vanga bo te; thenkhat chu thinurna avanga kalbo te; thenkhat chu kawngbo vanga chin hriat loh te; thenkhat chu chhungkaw thil te; thenkhat chu nakin hun ngaihtuah thiam loh vanga mahni duh dana kal chhuak ta mai te an ni hlawm a. Hetiang hunah hian khawtlang mipui ten Mibo chanchin sawi chhawn dan kan tlem kan zir a la ngai deuh niin a lang.

    Tun tuma kan Mibo zawn hmuh tak pawh hi mipui rilru-in hre zui reng lo ila. Naupang mai an la ni a; puitling ngaihtuahna ang an la nei phak lo tih hriat sak ila. Dam taka kan hmuh leh theih avang hian lawm ila a tawk viau a ni. Chanchin sawi chhunzawm awm tawh lo se a tha ber. Chu chu ram Dan pawhin a duh dan a ni a. Mipui ten kan tih theih chuan a lawmawm khawp ang. Keimahni ngaihtuahna puitling tawh sa leh kan thlirna dinhmun atangin teh sak lo ang u.

    Mibo kan mek kan hmu a; mipui te lawm ila. Tlawmngaiin mi tam tak an thawk chhuak a. Sum leh pai sengin lirthei an thawh a; hah pawh sawi lovin kan hnatlang a. Chu chu kan sawizui tur ni ber mai se la; Lawmthu inhrilh tlang ila a tawk viau a ni.

    No comments

    Post Top Ad

    Post Bottom Ad