• Breaking News

    Liverpool-in Chelsea an hneh

    Chawlhni zan khan Premier League inkhel pahnih awmah Manchester City chuan Crystal Palace an hneh a. An chak hnu lawkah Liverpool chuan Chelsea an hneh ve leh a, Premier League hmahruai-tu an inthlak zing hle.

    Anfield-a inkhelah Liverpool chuan Sadio Mane leh Mohamed Salah goal ropui hmangin hnehna an chang a. Kum 5 liamta ah khan Chelsea hian tun ang hunah hian Liverpool chu 2-0 a hnehin Liverpool an champion loh phah a. Tun \umah erawh a dan a dang ta a. Minute hnih chhunga Liverpool goal hnih hmangin boruak a danglam ta vek a ni.

    First half-ah Liverpool chu a chungnung zawk ni mah se goal an khung thei bik lo va. Second half-ah erawh Liverpool-in Chelsea an nawr bet hneh hle a tih theih a. Mane chuan goal a khung ta mai reng a. Salah chuan Virgil van Dijk-a hnen a\anga a ball lak chu ni dang ang bawkin box chhungah a la lut leh dawn emaw an ti a, mahse, box pawn a\angin a ke veilamin a hem a, a goal chiang kher mai.

    Tun season-ah Premier League goal 19 a khungna a ni ta a, Premier League goal of the season an thlan hunah an thlang lo a nih pawhin, nomination hmu zingah chuan a tel ngei a rinawm a ni.

    Chelsea hi Anfield-ah hian kum 2012 hnu lamah chak loh nei lovin an kal tluang tawh a. Mahse, tun \umah hian Eden Hazard a luck lo va. Goalkeeper chiah awm tawhah goal a khung thei lo.

    Hetih lai hian Liverpool hian hun tawp lam thlengin Chelsea an nawr bet a, goal dang pawh an khung leh teuh hle.

    Jurgen Klopp chuan Liverpool game 200 a khelhpuina a ni a, an chak a, Premier League-ah hma an hruai leh ta a. Champion lai Manchester City aiin point hnihin sang zawk mah se, game khatin an khel tam zawk a, City an chak vek chuan champion ngaihna a la awm chuang lo va. City an chet sual an chang a ni.

    Liverpool hian Cardiff, Huddersfield, Newcastle leh Wolves-te an la tum dawn a. Hetia en mai chuan chak vek thei tura ngaih an ni a. An chak vek ang tih erawh sawi theih a ni bik chuang lo.

    Eng pawh ni se, tuna a lan danah chuan Premier League champion inchuhna hi season tawp rat thlengin kan hmu dawn niin a lang a. City leh Liverpool inum avang hian tun season-ah Premier League-a hma hruaitu hi vawi 25 an inthlak hman tawh a. Indopui pahnihna hnuah season khat chhunga English top flight-a hmahruaitu an intlak ngun ber season a ni mek a. City hi an chak chuan hmahruai -tu an ni a, Liverpool-in chak ve lehin an thlak ve leh \hin a. Hei hi tunlai Premier League kar tin thil awmdan a ni deuh a. City hian an khelh leh turah Tottenham leh Manchester United, top 4 nih tuma bei ve ve an la hmachhawn dawn a, point hloh tak maw??


    City-in Palace an hneh

    Raheem Sterling  chuan goal hnih a khung a, Gabriel Jesus chuan goal khat a khung bawk a. Manchester City chuan Selhurst Park-ah mual neitu Crystal Palace chu 3-1 in an hneh a. Chawlhni zan khan rei lo te Premier League hmahruaitu an ni zuai a. An hnu lawka inkhelah Liver-pool an chak leh avangin pahnihna-ah an tla thla leh nghal.

    Sterling hian goal hmahruai a khung a, Kevin de Bruyne-a pass nalh leh awmze nei tak hmangin goal a khung a. Leroy Sane pass chu goal-ah chantir lehin, City-in 2-0 in hma an hruai a. Palace tan Luka Milivojevic chuan free-kick a\angin an si phurh a rawn sut \hen a. Mahse, Jesus chuan goal a rawn khung belh leh a, City an chak chiang hle.

    Game 5 khelh tur an la nei a, an chunga awm Liverpool aiin point hnihin hniam mah se, game khata an khelh tlem zawk avangin  an khelh leh turah an chak vek chuan point 1-in Liverpool aiin an tam thei a, an champion thei a. Mahse, an game 5 khelh turah hian season thara Champions League khel pha tura top 4 luah ngei ngei tum pahnih - Tottenham leh Manchester United an la awm a, hei hi Liverpool innghahna a ni ngei ang.

    City hian season hnih chhungin point 183 an hmu tling ta a, pui tak a ni.

    Palace hi tun season-ah an home-a vawi 9 an chak lohna a ni ta a. Tla chiang tawh Huddersfield chiah home-ah an aia che chhia an awm.

    No comments

    Post Top Ad

    Post Bottom Ad