• Breaking News

    Ei tur thianghlim

    Tunlai hian Whatsapp lamah damdawi hmanga Dawnfawh chiu thlalak hmuh tur a rawn darh leh a; he Vedio hi tun hma pawhin a lo darh tawh thin. Vedio sawifiahna ah chuan Dawnfawh chhung tihsen nana damdawi hman leh tihthlum nana damdawi hman angin sawi a ni. Eng damdawi nge hman anih erawh tuman an sawi ngai lem lo. Vur rawng emaw thil dang pawh a ni thei.

    Hetianga ei tur sawi hlauhawmna Vedio hi mipui fimkhur inzirtirna hmanrua tha tak anih rual chiah hian sumdawngte intihchhiat tumna hmanrua pakhat a ni tel tih hirat a tha. Hman deuh khan naupang chhang ei thin Nabati chungchang ah pawh vedio siam chawp a rawn chhuak tawh a; mithiam ten an han zir chian chuan Nabati ah thil hlauhawm a awm lo a; chhang siamtu company dang ten kha vedio kha an tihchhuah niin an ngai ta anih kha.

    Dawnfawh chiu lai Vedio vawrh darh anih rual chiah hian Vaiho in kan ei tur an suasam nasat zia sawi tel a ni a; chumi dawt chiah ah chuan Burma lam atanga Dawnfawh thar chu thianghlim zawk anga tarlan zui nghal a ni a. Dawnfawh hi Vur rawng hmanga chiu anih chuan Vawr pawh kan ei tho a; mihring tan a hlauhawm lo mai thei. Mahse Burma lam atanga Dawnfawh rawn phur thin ten Vairam Dawnfawh sawi hnawmna hmanrua atana hman an duh vang a ni thei bawk. A finfiahna tha ber chu Medical Deptt hnuaia ei tur endiktu lam ten an zirchian hi a ni zawk.

    Tunlai thiamna hmangin, mi tupawh hian midang hmuhpui lem lohin Vedio te chu kan Phone Camera atang pawhin kan siam zung zung thei mai a; Dawnfawh chiu lai Vedio pawh hi hman ami kha a la ni reng a. Kha Dawnfawh kher kha Bazar ah an rawn zuar em tih tuman an finfiah thei lo. Agriculture Scientist te pawh Experiment an tih duh avangin khatiang khan thlai an sawngbawl fo a; zirna tur a ni. Tunlaia rawn darh mek hi chutiang vedio chu a ni lo tih tuman an sawifiah thei chuang lo.

    Chutih rual chiah chuan Burma lam atanga Dawnfawh rawn phurh luh pawh chu eng anga sawngbawl leh enkawl nge anih tuman kan hre bik chuang lo a; a chinna leilung ah Chemical a tel leh tel loh pawh kan hre chuang bik lo a; whatsapp lama vedio hmuh tur kan neih ve loh avang khan a thianghlim bik tihna a ni chuang lo. A thianghlim leh thianghlim loh sawi thei tur chu Sawrkar in a bik taka ei tur lam enfiah tura a dah te chauh an ni ang.

    Mipui hi kan inbum kual mai mai a ang. Eng mah finfiah si lo hian ngaihdan kan neih hi thu dik sawiin kan sawi nghal hmiah zel mai a. Sangha zawrh tur-ah a vawn that nan Formalin an chiu lut tih te kan hria a; vedio te hmuh tur a awm a; khang Sangha te kha eng emaw chuan an chiu ngei a; mahse an chiuna damdawi kha Formalin a ni ngei tih tuman an finfiah thu an la sawi lo. Formalin dik tak nise a chiu-tu zawk khan Sangha khatiang zat kha Formalin hmangin a sawngbawl thei lo ang, a Mit leh Hnar ten a chhiat phah mai ang.

    A pawimawh ber zawk chu whatsapp lama thlalak kan hmuh rual chiah hian eng Damdawi nge, khawi lai hmun nge, tu te nge, eng tik hun a mi nge tih lo inzawt ve thin ila. Thalak sawifiahna hi chu tupawhin an duh danin an phuahchawp thei a; sumdawnna intihchhiat sak tumna pawh a ni zawk thei a ni. Ei tur thianghlim kan duh a; fimkhur nan kan hmang ang a; mahse a nihna dik tak hriat erawh tum a tha.

    No comments

    Post Top Ad

    Post Bottom Ad