• Breaking News

    Dan zawm a tha ber

    Ram hruaina atan Dan a awm a; mipuiten Dan kan zawm si loh chuan Dan awmze nei lo tihna a ni. Khawi ramah pawh Dan zawm thatna apiangah ram mipui an zalen a; ram chhung inrelbawlna pawh a tha. Dan zawm thatlohna ramah chuan mipui an chep thin.

    India hi khawvela Dan nei tha ber pawla sawi a ni thin. India-ah hian President a lal ber a; Prime Minister leh Minister dang ten mipui tan hna an thawk a. Anni pahnih hi ram chhunga mi pawimawh bik an ni. Mahse anni pawhin Dan an zawm tho a ngai a. President emaw Prime Minister nih vangin Dan a bawhchhe thiang chuang lo a. Dan an lo bawh chhia anih chuan an nihna atanga ban tir an ngai a; ban tir an nih hnu-ah Dan hmang hrem theih an ni.

    Ram Dan hi lal ber lo sela chuan President in mipui a nek chep thei viau a; Prime Minister pawhin mipui tana tha lo thil a tithei viau ang. Chutiang bawkin State ah Governor leh Chief Minister te hi mi pawimawh tak an ni a. District chhung ah pawh Deputy Commissioner hi administration kengkawhtu anih avangin a thuneihna a sang hle a. Khaw chhung inrelbawlna pawh Village Council an chungnung larh mai a. VC Member chu kan thiante emaw, kan Kohhranpui te emaw; NGO lama kan thawhpuite pawh nise VC an nih chuan an nihna zah sak an ngai a. Mi naran anga kalkan mai mai tur chi an ni lo.

    Mipui chunga rorelna mai piah lamah ram mipuiten Dan zawm tur kan ngah hle bawk. Zalenna zau tak kan nei a; mahse kan zalenna chuan midang pawi a sawi thiang hauh lo a ni. Midang tana hreh tih theihna khawp thil kan tih phawt chuan Dan hma-ah kan Zalenna kha chhuan theih a ni tawh lo a. Hrem ngai kan ni zawk.

    Social Media (Whatsapp te; Facebook te; Twitter te) a lo chhuah tak hnu hian mi thenkhat chuan an duh duh thil an ti ta mai emaw tih tur a ni. Rights to Freedom of Speech and Expression chu India Constitution in min neih tir ngei mai. Mahse chumi huang chhungah chuan tih loh tur tam tak a inziak tel thung a. Chu chu kan hre leh si lo hi a pawi a ni.

    Tun lai hian kan khawtlang ah hmeichhe naupang a bo a; a chanchin ngaihvenin khawtlang hruaitute an buai hle a. YMA phei chuan chuan tha leh sum a seng nasa tawh hle. Bo zawnna lama thahnem kan ngaih luat avangin Dan kan bawhchhe thei a ni.

    Mibo hi Hmeichhe naupang a la ni a; India Dan lam kan thlir chuan a laka pawisawi theihna kan ngah hle. Dan hre meuh lo ten Thlalak an tidarh vak a; thenkhat lahin zawhna kilkhawr tak tak, bo zawnna atana tangkai hauh lo kan inzawt a; intihria niawm takin mimal ngaihdan nen kan sawifiah thul. Mi tu in emaw he thil-ah hian Thubuai thehlut ta mai sela chuan ‘Bo kan zawng alawm’ tih kha Dan hma-ah chhuanlam a tling dawn hauh lo.

    Political Party te kan campaign a; kan duh hawi zawng zawngin thu kan vawrh darh a; hei pawh hi thil pawi tak a ni thei. Mizote hi Court lama thubuai thlen hreh mi tak kan nih avangin mi thenkhat hi chu an la awm mai mai thei chauh a ni. Chutianga thubuai a awm loh avang chuan a ‘Thiang’ tihna a ni chuang lo a. Kan fimkhur a tha hle.

    Dan kan nei a; zawm tum mai ila. Dan kan hre tawk lo anih pawh a hria te zawh tur an awm reng bawk a. Hriat loh chuan zawt hreh lo mai ang u.

    No comments

    Post Top Ad

    Post Bottom Ad