• Breaking News

    AWITHANGPA GROUP YMA-IN HNAMDANG PASAL NEI LEH AN FATE MIZO-AH CHHIAR LO

    Awithangpa Group YMA Executive Meeting Inrinni-a neih chuan Group Conference in Mizo Hmeichhia Hnamdang (non tribal) pasal nei te chu Mizo anga pawm tawh loh tur tia a rel tawh bawhzui dan tur an ngaihtuah a. Mizo Hmeichhia in Hnamdang pasal a neih chuan anmahni leh an fate chu YMA Member Fee bakah YMA in a buaipui thil khawn chi hrang hrang te April 2019 atangin khawn tawh loh nise an ti a. YMA in lehkha a ziam sak thin, recommend-na leh thil dang reng reng ah pawh eng lehkha mah pek tawh loh an rel a ni. Sawrkar-a lehkha pawimawh thenkhat lak chhuah leh dil dawnin YMA hriatpuina a ngai thin a; chung thil ah chuan hnamdang Pasal nei leh an fate reng reng chu YMA in a ziah sak tawh dawn lo.

    YMA Branch hrang hrang ten Hnamdang Pasal lo nei tawh te dinhmun an sawina ah Branch thenkhat chuan an fate pawh YMA member anga pawmin Mizo dang angin an enhrang chuang lo a. Branch thenkhat erawh chuan YMA Member Fee leh Kuang man te an khawn lo thung a, Hnam dang anga an en nghal thu te pawh sawi a ni. Mahse Group YMA Conference in a rel angin tun thla atang chuan Hnamdang pasal atana nei Hmeichhia leh an fate chu Mizo pangngai anga en tawh loh tur an ni dawn.

    Inrinni-a Group Executive Meeting hi Pu Rochuhthanga Group YMA President in a kaihruai a; kum 2021 YMA General Conference thlen dil dan tur chungchang an ngaihtuah a; dilna ah hian Kawnpui-a thlen dil nghal nise an ti a. General Conference thlen dil chungchang ah hian bawhzui ngai dang awm apiang te chu hruaitu ten an lo bawhzui dawn a ni.

    Nungcha humhalh Campaign neih dan tur chungchang pawh ngaihtuah a ni a. EF & CC nen tangkawpin Group YMA huam chhung khaw hrang hrang ah neih an rel a; hei bakah hian Branch tinte chu anamhni Branch ah theuh theih tawp chhuah turin an ngen bawk a; Group hruaitute pawhin Branch an tlawh hunah hei  hi thupui pakhat atan hman a ni ang.

    Kawnpui PHC-a Dental Surgeon dah anih theih nan Sawrkar hotu lian te hnena ngenna siam an rel bawk a. Group YMA Office sak chungchang ah a hmunhma ngaihtuah chhunzawm zel an rel bawk.

    Group YMA Committee-ah hian 2019 Group YMA Confernce chungchang thlirletna hun hman a ni a. Confernce chhung hian Deptt hrang hrang hnen atangin Rs 36000.00 dawn a ni a. YMA Conference ah naupang an tel tam lutuk sawihona ah naupang te chu YMA thil-ah chanvo pek tam loh a tha an ti a. Group Conference hun pawh March thla chawhma lam ni thei se duhthusam a ni an ti bawk.

    Sum enkawltuten report an pek danin Group YMA chuan Rs. 239337.00 a kawl mek a ni.

    No comments

    Post Top Ad

    Post Bottom Ad