• Breaking News

    YMA-in Hortoki kawng siam mek sawiho; Railway Ministry-a thu thlen tur an duang

    Awithangpa Group YMA OB leh Hortoki Joint YMA hruaitute chuan Ningani khan Kawnpui leh Hortoki inkar kawng siam mek chungchang an sawiho a; an thil hriatthiam loh thenkhat kawng siamtu Company hnenah an zawtfiah nghal.

    Hortoki Jt YMA hruaitute chuan ‘Hortoki kawng hi Railway Ministry-in siam tura ruahman anih lai khan Railways Engineer te chuan kawngpui chhuat chu 1.5 feet a chhah tur a nih thu an sawi a; Tuiluankawr siam dan pawh a tir lam aiin tunah hian a derdawp tial tial ta bawk a; hmun thenkhat laiah chuan siam zawh hma-in a chhe leh tawh a; hetiang chuan lirthei rit phur ten an zawh hun-ah rang takin a chhe leh mai dawn a ni’ an ti a. Hei bakah hian Joint YMA hruaitute chuan ‘Kawnpui atanga 12 kms thleng hi Mizoram PWD chuan Railway Ministry kutah a hlan a; 12 kms leh Hortoki inkar chu Mizoram PWD enkawl tur a ni thung a. Mahse tunah hian Company chuan 12 kms thleng lovin 300 metres vela thui chu tu ve ve mahin siam an tum lo’ tih an sawi bawk.

    YMA hruaitute chuan PWD hotute bia-in Kawnpui atanga 12kms thleng chu Railway Ministry kutah ziak meuhin an hlan tawh a; inhlanna lehkha pawh en theihin a la awm a ni an ti. Chutihlaiin kawng siamtu Company chuan 12 kms thleng siam tura tih an ni lo a; an hna chu Kawnpui atanga Hortoki Rel Station panna kawng tih a ni mai a; 12kms thlen hma hian Rel Station panna kawng hi a peng a; hei vang hian an hna thawh tur ruahmanna ah a tello an ti thung.

    Tuiluankawr siam dan chungchang sawiin Company chuan a tir lamah Ministry thu ang nilovin Iron Rod nen tha ber tur angin siam a ni a; mahse Ministry in Tuiluankawr atan 2000 cum bak Bill an pe thei dawn lo a; tunah hian Tuiluankawr hi 4 kms a thui chauh siam tur a ni a; Ministry in a tih belh loh chuan an hna thawh tur piah lam a ni’ tiin an chhang thung. Hei vang hian YMA chuan Detail Project Report (DPR) chu YMA hnenah a copy pe ve turin an ngen a; pek an remti bawk a ni.

    Nimina Group YMA leh Hortoki Joint YMA te meeting chuan Hortoki kawng siam chungchang ah hian Kawnpui leh Hortoki atang ringawt chuan thu a chiang thei dawn lo nia hria-in Railways hotu lian zawkte awmna Silchar leh Guwahati thleng umzui nise an duh tih an sawi a ni. Railway Ministry-a thu thlen dan tur pawh an duang nghal a ni.

    Kawng siamtu Company in tualchhung mi a rawih Pu Selzampuia chuan ‘Railway Ministry hian Tuiluankawr pawh siam belh tur a tih chuan an siam belh thei reng a; Iron Rod nen tlo taka siam tur a tih pawh an ti thei tho a; 12kms thleng Blacktop tur atih pawhin an ti thei tho bawk’ tih sawiin Company chu Ministry in thawh tur atih ang apianga thawk tur an ni mai a. Thuneihna an nei lo a ni a ti.

    Sawihona hi Group YMA in an kaihruai a; OB te an tel kim a; Hortoki atangin Joint YMA OB te bakah Branch hruaitute an tel bawk.

    No comments

    Post Top Ad

    Post Bottom Ad