• Breaking News

    Wildlife Squad

    Nungcha, Sava leh Ramsa humhalhtu pawl te an mangang ta deuh a niang, Sawrkar Deptt chuan Wildlife Squad hial a din ta a; he Squad ah hian District khat chhunga hotu ber chu Law and Order kengkawngtu District Police SP a ni a. Squad zawng zawng ah Police Officers an tel zel bawk a. Wildlife Squad din dan hmang han thlir hian mipui te ah hian inzirtirna mai a tawk zo tawh lo a; Thubuai siam theitu emaw an tel a ngai ta niin a lang a. Ngaihtuah a tithui hle.

    Ramsa leh Nungcha humhalh hi tun hma atang khan EF&CC leh NGO te hmalakna tura ngaih a ni thin a. Anni chuan an theih ang tawk pawhin hma an la reng bawk. Chuti chung chuan a sawt lo viau a ni ngei ang. Vawiin ah chuan Police te nena beihpui thlak a lo ngai ta hial a ni.

    Ramar leh Vahrit te hi Sava zingah chuan tlema a hleitling deuh an ni mai a. A dang phei chu chhungkaw khamkhawp lakhawm tur chuan harsa tak an ni. Sava pakhat an kap thla a; an lawm phah viau. Mahse chu sava chu te tak te a ni thung. Chhungkua-a han inhnemhnanpui tham pawh a ni meuh lo. Chuti chung chuan Sava veh kan la sim thei chuang lo a ni. Hun leh tha kan senna han chhut phei chuan hlawk lo tak a ni.

    Sava vehtu te hian nuam an tih vanga veh an ni deuh ber. Eizawn nana hmang an awm lo ang. Kan ngaihtuah tel ngai loh thil a awm a ni. Sava leh Thehlei lam chi te hi lungmuang taka ramhnuai-a an awm hian an mawi a; an ralmuang lai hmuh phei chu mihring tan pawh a hlimawm. Kahthlak hnu hmuh aiin a dam lai ngei hmuh hi a nuam zawk.

    Silai siamtu ten Silai tha tak tak an siam a. An silai siam te hi Ramsa leh sava tihhlum nana siam an ni lo. Silai kah hi infiamna chi khat, inelna thianghlim a ni a. Chuta hman tura siam chu a ni. Sawrkar pawhin Silai Licence a pe chhuak thin a. Licence diltu chuan Licence a neih hma-in ‘Environment tichhe lo turin a intiam thin’. Mahse Licence an nei a; an duh lam hawi zawng zawngin an Silai chu an lek chhuak ta mai a ang.

    Thenkhat phei chuan anmahni tawkin Silai an tuk chawp a; Nunna atan a him lo hle. Mahni ngei pawh intihpalh awl tak a ni. Sava te reuh te; hausakpui tham pawh nilo Ramsa avang khan piangsual thei dinhmunah an ding a. A pawi hle.

    Mipuite hian humhalh duhna thinlung hi nei ila. Wildlife Squad din pawh a ngai kher lo ang. Kan zavaia kan humhalh chuan Squad chuan tih tur a nei dawn lo tihna a ni a; ven ngai lovin humhalh i tum mai ang u.

    No comments

    Post Top Ad

    Post Bottom Ad