• Breaking News

    Wildlife Squad ten fehchhuah an tum, Airgun zawng zawng Licence siam ngai an ti


    Kawnpui Dt. 6th Mar., 2019  : Nimin khan Kawnpui Wildlife Squad member te chuan Kawnpui Forest Range huam chhunga Nungcha leh Ramsa humhalh kawnga hmalak dan tur an sawiho a; tunkar chhung hian a vawi khatna atan fehchhuah an tum.

    Pu Vanlalruata RO EF&CC chuan nimina Wildlife Squad Meeting hi a kaihruai a; Dist Committee in Squad hrang hrang a siam dan leh a beisei dan a sawi a. Tun hnaiah Kolasib Squad ten Sava vehtute Silai an man sak chungchang leh Police in an hren sak chungchang a sawi nghal bawk. Nimina Squad Meeting ah hian Police Station OC chuan ‘Sava veh nana hman Airgun zawng zawng pawh Sawrkarin Licence siam vek tura thupek a chhuah thu a sawi a. Chutih laiin Airgun bikah Licence siam tir an tlem hle a ni’ a ti.

    Airgun chungchang ah hian Rifle Association member te chuan Association ID Card an neih chuan Licence tel lovin Airgun an kawl thei a. Mahse Association kaihhnawih ni lo; Sava veh nan leh ram kalna-ah an keng chhuak thiang lo va; chutianga keng chhuak an awm chuan man sak theih an nih dan pawh sawi lan nghal a ni.

    Thawhtanni khan Khamrang ram chhungah Silai hmanga Sava veh an awm thu hriat anih avangin Forest Deptt Staff te chu a hmun ah an kal nghal a. Sava hmul leh Sava puahna hnuhma va hmu mahse Sava vehtute hi an lo haw hman nia an hriat thu sawi lan a ni bawk.

    Wildlife Squad te an fehchhuah hunah chuan Sava vehtu Silai leh Sairawkherh man sak te chu Dan anga kalpui nise an ti a. Bazar ah Sava leh Ramsa emaw, Thehlei leh Chepa lo zuar te pawh Dan anga man sak an tum tih sawi lan a ni a. Ramvakmi te pawh Silai keng chhuak an hmuh chuan Dan angin an chungah action lak a ni ang ti. Squad Member Meeting chuan Sava veh leh Sa pel lam chi reng reng ah mipui te fihlim turin an duh a; Dan phal loh ang hmuh anih chuan ngaihhnathiamna a awm dawn lo niin an sawi bawk a; Kawnpui bul hnaia fehchhuahna hmun tur leh fehchhuah hun tur pawh an ruahman nghal a. Mahse mipui ah puanzar rih loh nise an ti.

    Kolasib Wildlife Crime Control Sub Unit Committee duh dan angin thla tin vawi hnih tal Squad member te hi an feh chhuak \hin ang.

    No comments

    Post Top Ad

    Post Bottom Ad