• Breaking News

    Vote thlak ngei tur


    Democracy rama thil pawimawh ber nia sawi thin chu Election hi a ni. Election kaltlangin mipui ten kan ram hruaitu tur kan thlang a; thlangtu zinga tel ve thei turin Sawrkar leh ECI chuan engkim min ruahman sak. Election atan hian Sawrkar pawisa a hek nasa thin, mahse a pawimawh avangin tuman an sawisel ngai lo.

    Mizo zingah hian Election huna vote thlak ngai pawimawh tawk lo tlem kan la awm. Intlar peih loh vang te; thlan tur hriat loh vang te; vote thlak hman lo nia inhriat vang leh kal peih loh vang te kan chhuanlam duh hle. Dik taka sawi chuan heng te hi chhuanlam a tling tawk lo a ni. Ke-a kal harsa deuh tan lirthei a awm a; Vote thlak tura tanpui ngai te pawh mi tlawmngai ten an tanpui thei reng a. Kan tum chuan Vote kan thlak vek thei ang.

    MLA Election ah thahnem kan ngai viau a; kan rilru pawh kan seng nasa a; Party te pawh an Campaign na sa bawk. Mipui pawhin Vote kan thlak tha thin. VC Election ah pawh vote kan thlak tha viau bawk. MP Election ah hian Vote kan thlak tha tawk lo fo mai. Vote kan thlak ve kher loh pawha tling thei tho tihna rilru pu mi eng emaw zat an awm fo a ni.

    Voters ID Card te, Electoral Roll-a hming chuan te hi Election thil atan a ni a; Vote kan theihna tur a ni. Documents pawimawh zing pakhat ang chauha ngaih tur a ni lo. Mi tam zawk hi chuan a nihna tak kan hre lo a ni mai thei.

    Ram hruaitu hi kan thlan tur a ni a. Electoral Roll-a hming chuang ve lo ten min thlan sak tum ta sela kan lungawilo viau ang. Chuvangin hming chuang ten kan thlang ngei tur a ni bawk.

    India ram hi eng tiangin nge kal se kan duh tih rilru seng thiam lo puitling zingah kan awm lo ang. India awm dan tur atana kan duh tilang turin Vote hmangin ram hruaitu kan thlan phawt a ngai. Ram hruaitu thlang si lovin duh dan leh ngaihdan kan neih leh si chuan kan kalkawng zawh tawh kha Democracy kalphung a ni dawn lo a. Vote thlak hi tih ngei turah i ngai ang u.

    Vote thlak tum lem lo; ngai pawimawh lem lo kan hriat pawhin a tulna leh pawimawhna hrilh ila. Ram tana ke kan pen theihna pakhat a nihzia pawh sawi fo ila. Ram hruaitu thlang theia zalenna kan neih hlutzia te pawh sawi tam ila. Min kaihruaitu tur thlan hi kan mawhphurhna a ni tih i sawi nawn fo ang u.

    No comments

    Post Top Ad

    Post Bottom Ad