• Breaking News

    Tui tla hlum


    Khua a lo lum ta deuh a; Fur ruahtui a la tla nasa lo a; Lui lama chetla leh intihhlimna te; inbual leh insil tura lui kal zingah Tui-a tlahlum chanchin hriat tur a awm leh ta nual mai. Tuna chanchin kan hriatte hi mi khua-a mi te an ni hlawm a; mahse kan khaw chhung mi ngei chungah pawh thleng thut thei a ni reng.

    Tui tlahlum kan hriatte hi kum naupang lam; Tleirawl tia kan sawi thin te an ni deuh a; an fimkhur tawk lo deuh pawh a ni mai thei. Lui kan thlen hian kan phur thar fo a; a tam zawk chuan an zuam sual a ni deuh ber.

    Hnatlang-a Puansu leh picnic chesual pawh kan awm fo tawh a. Chuti chung chuan Lui lama chet hian kan rilru a la luah tho mai. Thenkhat phei chu an fimkhur thiam lo deuh te pawh a ni ang.

    Tleirawl te hian Lui kal rawt an phur duh viau a; a chang phei chuan chhungte remtihna tello-a kal te pawh an awm thin. Tleirawl hnena fimkhur tura inchah hi Lui thlen chuan hriatreng a harsa pawh a ni ngei ang. Chuvangin Lui lama intihlim emaw, hunawl hmang tur chuan remtih loh mai hi a finthlak a ni.

    Kum kalta lamah khan naupang tuitla te pawh kan hria a. An chanchin han hriat zui khan Nu leh Pa ten an ngaihsak tawk lo a ang. Lui kamah hna an thawh san a; anmahni tawkin Tui-ah an lo awm a; thihna a thlen phah hial. Lui kam hnaia hnathawhna-ah naupang hruai lo thei ila a duhawm bawk.

    Thihna a lo thlen tawh chuan inchhir viau khan awmzia a nei tawh lo. Sangha leh kaikuang tlemte it-na avangin kan nunna kan chan leh thin. Thihna a lo thlen tawh chuan kan chhungkua chauh kan buai lo a; khawtlang kan buai tawh thin a; manganna nasa tak kan tawk thin a ni.

    Thihna hi pumpelh theih a ni lo mai thei. Mahse Lui lama kal ngai lo leh fimkhur tawk thiam te chu tui-ah an tlahlum ngai meuh lo. Kan phur lutuk avang te; nuam tawl nia kan inhriatna avang te; kan chakna avang te hian tawhsual kan tawk thei a ni.

    Tui-a tlahlum chanchin hriat a hrehawm a. Chuvangin Lui lama kal lo tura infuih te hi ching ila. Thianzaho-a rawt phurna avanga liam mai chi a ni lo a; kan nunna nena thleng tur thil tam tak a awm a ni tih i hria ang u.

    No comments

    Post Top Ad

    Post Bottom Ad