• Breaking News

    Speed Breaker tam lutuk

    National Highway ah chuan Speed Breaker siam turin Highway thuneitute phalna lak a ngai a; a siam dan kalhmang tur pawh duansa ang thlap a ni tur a ni a; tin, hmun hla taka hmuh theih tur pawhin Rawng var hnawih ngei tur a ni bawk. Speed Breaker te hi mihring te himna tura tih anih rualin lirthei tana harsatna thleng tur khawpa siam phal a ni chuang lo a. Chetsual tiawlsamtu zawk anih phei chuan Dan in a phal hauh lo a ni.

    Speed Breaker avang hian India ram hmun thenkhat ah pawh Court thubuai a awm zeuh zeuh tawh a; thubuai zinga a tam ber chu lirthei tlan lai tibuai phak khawp leh lirthei in a tawrh theihna awm ang chi te a ni. Kawngpui chu lirthei tluang taka a tlan theih nana siam a ni a; mahse Speed Breaker a tam lutuk vanga lirthei tlan a tluan loh chuan Dan phal chin piah lam thil a ni. Chu chauh nilovin Speed Breaker siam danah Dan zawm tur a awm a; chutiang ngaihtuah lova mahni duh dan ang hawi zawng zawnga siam te; a san zawng bithliah zawm loh te; Speed Breaker leh Speed Breaker inkar hlat zawng (thui zawng) zat te pawh zawm thlap a ngai a ni.

    Kawnpui khaw chhung kawng siamtu PWD hian Speed Breaker hi an uar lutuk mah mah em ? Awithangpa Road siam tirh anih lai khan Speed Breaker a tam hle a; kawngpui hmangtu tur mipui zawkin an ning a; an sawisel deuh hial a nih kha. Hmarveng lamah Presbyterian Biak In thlang chu PWD bawkin an siam leh a; hetah pawh hian Speed Breaker a tam leh lutuk a; sawiselna a nasa hle. Speed Breaker thenkhat phei chu lirthei in a chhiat phah ang tih hlauhawm khawpin a ko sang a; Dan in a phal aia sang anih a rinawm. Chung Speed Breaker te chu a sir zawng (diagonal) anga siam an la ni zui a. Engineer kut chhuak ni awm lo tak a ni.

    Tun hnaiah PWD vek hian PHC atanga Chhimveng lam pan chhohna kawng an siam thar leh a; hetah pawh hian Speed Breaker a tam hle hle mai. Lirthei pawh a tlan hman hmeuh loh a; a tibuaitu a ni zawk hial a ni. Kawng an siam tha a; Speed Breaker hmangin an tichhe zui nghal ang deuhin a ngaih theih.

    Mihring himna tur an ngaihtuah a ni mai thei. Mahse he ti em em lutuk hi chu lirthei leh a khalhtu ten an tuar let zawk daih a ni. Kawnga tui luang lo tura paihna ang deuha an ngai nghal anih chuan kawngpui chhuat siam dan a dik tawk lo deuh tihna pawh a ni thei lo.

    Tunah hian PWD chuan Vengthar atanga Town Hall panna kawng an siam leh mek a; he kawng thar ah hi chuan Speed Breaker tam lutuk siam tawh lo se a tha mang e. Motor Speed tih zawih ngaih khawpa kawngpui lian leh mam tha a ni chuang lo a; kan Speed hi ama tawk pawhin a in Breake sa tawh hrim hrim bawk a; lirtheia nuam taka tlan theih mipui ten kan duh ber tawh zawk a ni.

    No comments

    Post Top Ad

    Post Bottom Ad