• Breaking News

    Social Work, Hlawh tisang, Mizo National Day, etc.



    St. Thomas School, Kawnpui
    St. Thomas School, Kawnpui
    Social  Work  nei
    Nimin khan St. Thomas School, Kawnpui-a Scout & Guide Unit te chuan  Elementary chawlh lai denchhenin pawl thiltum zinga vantlang tana thil\ha tih tihhlawhtlin nan vantlang hmunhma te tifaiin hnatlang an nei.

    Hlawh  tisang  dawn
    New High School Managing Board chuan Bialtu MLA in School building sak zawh sak a tumna chu VC ten theih tawp chhuahin lo bawhzui se an ti a; Sawrkarin Lump Sum Grant a pek thin tih san a nih vang leh VC ten thla tin Rs 5000/- an pek belh theih dawn avangin  thawktute hlawh tihsan an rel bawk. New High School Zirtirtu leh Zirlai ten Sikkim-ah Education Tour an nei dawn a; Board Meeting chuan rem a tih sak bawk a ni.

    Railways  hotute  biak  tum
    Vawiin tlai hian Hortoki Joint YMA leh Hortoki VC te chuan Kawnpui leh Hortoki inkar kawng siam chungchangah NEF Railways hotute nena sawiho turin Silchar an pan dawn. Khawtlang hruaitute hian Rel Station panna peng leh 12 kms awmna inkar kawng siam belh chungchang bakah Tui-luankawr siam chung-chang an thlen ang. He hunah hian Awithangpa Group YMA pawh kal ve tura beisei an ni.

    Mizo  National  Day
    Kum 1966 March ni 1-a MNF in Mizoram Independent a puan ni denchhenin nimin khan MNF Party Office ah Party President Pu Zoramthanga hovin Mizo National Day hman a ni. Kumin hian Chapchar Kut nen a hun a inrual avangin a ni takah hman a rem lo niin MNF thuchhuah chuan a sawi.
        Chief Minister ni bawk Pu Zorama chuan ‘Mizo Nationalist movement hi ral ngei ngeina tura ngaihah vawi tam tak a damchhuak tawh a. Pathian rawngbawl tum tlattu kan nih avang chauha dam khawchhuak kan ni’ a ti a. Khatih lai khan Mizo Nationalism tihchhiat vek tuma sipai an lo chhoh takah hian MNF-in kawng dang a nei ta lo a. Zalenna sual turin keimahni leh keimahni inphelhin zalenna atan kan inpe ta a ni a ti bawk.
        Chief Minister chuan "Mizoram chu India-ah kan awm ngai lo, 'excluded area' kan nih thu ka sawi a. British-in min chhuahsan dawnin India rama tel zel nge kan duh Burma zawm; East Pakistan lama beh nge Crown Colony a awm nge, independent-a awm tiin ngaihdan insual a awm a. Chutah British an chhuak a, kan tel ve lohna Constitution min barhlui a. Kum 1966-a zalenna suala kan kalchhuahna kha hei hi a chhan a ni reng a ni. Tichuan, kum 20 kan inkap a, inbiakna a lo awm khan 'Mizoram a tel ve dawn a nih chuan ram leh hnam leh sakhua inhumhimna kan duh tih kan sawi a, kan rawn tel ve chauh a ni," tiin tunhma Mizote dinhmun chu Union Home Minister hnena a hrilh dan a sawifiah bawk a ni.

    Sele   vuiliam
    Nimin khan Lungzarhtum khawtlang chuan, March ni 1-a Sele thi chu kuang siam sakin, kawng an zawhpui a, Ropui takin Lungzarhtum thlan mualah an vui liam. Lungzarhtum khawtlang chuan, Sele sa an hmuh let theih ang angte lakhawmin, Kuang mawi tak an siam sak a, VC, YLA leh LWA ten Lai puan in an tuam bawk a ni.

    Opposition  Leader  awm  lo
    Assembly Speaker Pu Lalrinliana chuan ZPM MLA Pu Lalduhoma, Opposition Leader ni tura MLA Pu Vanlalhlana’n a dilna chu a tlin zawhloh thu a sawi. Assembly Speaker chuan Mizoram Legislative Assembly-ah Leader of Opposition chu tun dinhmunah an nei maithei dawn lova, Group Leader erawh neih theih anih thu a sawi.

    No comments

    Post Top Ad

    Post Bottom Ad