• Breaking News

    SEDP kan beisei dan

    Mizoram ah Sawrkar a inthlak a; Sawrkar thar chuan Mizoram mipuite hnenah SEDP hmanga eizawnna nghet siam a tum a. Campaign lai atanga an auhla a ni. Sawrkar chuan a tingei turah nga ila. Mizoram Budget ah pawh SEDP atan sum ruahman a ni bawk.

    Hmasawnna tur Project hi Sawrkar apiangin tha tak tak an lo kalpui tawh thin. Tuna sawrkarna chelh mek pawh hian kum 10 hma lam ah ah khan MIP hmangin eizawnna nghet siam tumin Project an nei tawh a. Kha tih hun lai Mautam vanga harsatna sutkian nan BAFFACOS a awm bawk a. Sawrkar kalta pawh khan kum 10 chhung zet NLUP hmangin intodelhna tur Project an lo siam tawh bawk a. Tun hma pawhin State Sawrkar ni lo; Central Sawrkar pawhin Project lian tak tak a lo kalpui tawh thin.

    Mahse mipuite hian heng Project hnuaia hamthatna dawn kan tum dan hi a dik thin lo. Pawisa fai sem a, a thlawn neih tumna rilru lian tak kan la nei fo mai. NLUP pawh khan State sawrkar in a hman dan tur te a siam a; NEDP pawh chutiang tho chuan Mipuite tana tha ber turin ruahmanna kalpui a ni. SEDP pawh hi chutiang tho-a kalpui tur chu a ni ang.

    Project tangkaipui tur khawp rilru kan nei thiam tlat lo. SEDP chuan eng nge a tum tih hriat hmasak tum ila; chu Project hnuai-ah chuan eng eizawnna nge kan tan tha ber ang tih lo zirchiang ila; Sawrkar in Project a rawn kalpui hunah kan lo thawhrim tawhna nena tang-kawpin dawmchhuah kan ni zawk dawn a ni.

    Vawiin ah hian mipuiten cheng Nuai 3 dawn mai kan inbeisei chuan kan la tidik lo fo ang. Sawrkar in sum nei-in pawisa fai pawh min pe sela; a tam zawk hi chuan intodelh phah nan kan hmang leh lo mai thei. NLUP hnuai-ah pawh khan eizawnna sawh ngheh nana hman ai chuan TV, Washing Machine, Inchhung Furniture leh lirthei lam lei nan kan rilru kan seng daih a. Ei leh bar kawnga kan intodelh phah si loh chuan Inchhung bungrua changkang khan min dawm kang si lo a ni.

    Sawrkar in SEDP a rawn kalpui dawn tih chu mitinin kan hria. Mahse eng tianga lo dawnsawn tur nge tih lam erawh kan ngaihtuah lo a; kan rilru-a lian ber cheng Nuai 3 a ni mai. Tuna kan eizawn mekna tihmasawnna nan rawn ruahman ta daih sela; thenkhat hi chuan tihmasawn tur mumal kan lo nei reng reng lo mai thei.

    SEDP hmang hian pawisa dawn tum miah lo ila; kan eizawnna atana kan tih theih loh, kan mamawh leh tul tih nan sawrkar Project hi kan hmang dawn tiin ngai ila. Chutianga kan beisei phawt chuan Sawrkar in SEDP a rawn kalpui hunah pawh hmasawn phah nan kan hmang ngei ang. Inchhung bungrua leh Lirthei lei nan Pawisa min pe dawn lo tih hria ila; chung thilte chu kan thawhchhuah huna kan lei tur an ni zawk.

    Kan beisei dan a dik tawk loh chuan Project kalta te ang tho khan SEDP hian retheihna atangin min chhan chhuak chuang lo mai thei a ni.

    No comments

    Post Top Ad

    Post Bottom Ad