• Breaking News

    Sawrkar Policy sawisel

    Democracy ram kan nih miau avangin kan ram hruaitu tur kan thlang a. Ram hruaitu kan thlan thar apiangin mipui hmasawnna tur leh ram chhung dinhmun thatna tur ngaihtuahin Sawrkar hotuten rilru an seng a. Sum leh pai lama harsatna sutkian dan tur te an duang thin. Chung an thil ruahman te chu inti fing takin mahni thuthmun atangin kan lo sawisel a; a taka tih tumna awm si lovin zeldinna atangin kan thlir thin.

    Sawrkar liam ta, Congress Party kaihhruai Mizoram Sawrkar pawh khan Policy lian tham tak tak a nei a. Mahse mi thenkhat chuan fiamthu thawh nan kan hmang daih thung. NLUP hmanga mirethei dinhmun chawikan tumna Policy te kha thil tha tak a ni. Mahse NLUP tanpuina dawngtu mipui lamin kan hmang thiam lo a; a hlawhtling lo kan tih sak ta daih a. Sawrkar chu a tih tur ah a hlawhtling chiang a ni, mahse a dawngtu mipui ten kan hlawhtlinpui lo a ni zawk.

    Congress Sawrkar lai khan NEDP a lo chhuak leh a. Chu Policy chu a tir-ah chuan hnathawktu chawikanna tura ruahman ‘Tang puihna’ tih a ni a. Mahse a tak taka NEDP kan hriatna chu Civil Works lam, Contract leh sum siamna nena inkungkaih a ni thung. Chu pawh chu mi thenkhat chuan nasa takin an sawisel a ni. NEDP kha a chhe lo; mahse a tha zawngin kan thlir lo a ni zawk.

    Sawrkar a lo inthlak a; MNF Party chuan Sawrkarna an siam a; ram hruaitu pawh mi hrang kan nei leh ta a. Chief Minister in Agro based Development hrang hrang a sawi te chu mi thenkhat in fiamthu thawh nan kan hman sak a. ‘Mau bawk a sawi leh ta...’ tih te; ‘tih theih loh tur dream sang tak nei...’ ti te in kan sawisel sak a. Aizawl khawpuia Kawng chhawng (fly over) siam tumna pawh kan deusawh lek lek zawk a. Zu zawrh khap an tum bawk a; kan sawisel sak nghal bawk a; School Timing an sawn a, thenkhat chuan an sawisel leh bawk. Hei hi Sawrkar Policy kan thlir dan tur a ni lo.

    Kan ram hruaituten ram mipui te awm dan tur leh ram dinhmun tur an ruahman (policy) chu fiamthu thawhna tur chi a ni lo a; deusawh tur lam chi a ni hek lo. Nghakhlel takin kan lo thlir zawk tur a ni ang.

    Kum eng emaw zat kalta ah khan Mizoram ah Airport neih tumna a awm a; a hun lai kha chuan Airport kha nuihza siam nan te kan hmang a; tuman a hlawhtlin kan ring lo. Mahse vawiin ah chuan State pawn lama kan zin kawng pawimawh ber a lo ni der tawh mai. Airport sawi rik tan tirh laia nuihza siam nana hmangtute pawh an kimki deuh chawih a ni.

    Sawrkar chuan Policy a siam ang. Chief Minister leh Minister te pawhin an suangtuahna leh an duh dan an sawi ang a; tih an tum pawh an sawi ang. Chung thil te chu nuihza siam nan hmang lo ila; fiamthu thawh nan hmang lo ang u. Nakin-ah kan kimki ve chawih chawih palh ang e. Sawrkar Policy chu lungsi takin kan lo beisei tur a ni zawk.

    No comments

    Post Top Ad

    Post Bottom Ad