• Breaking News

    Ropui zawka Kût

    Nimin-ah Mizoten Chapchar Kut kan hmang a; nuam kan ti hle. Hlimna ni anih angin mitin kan hlim tlang bawk a. Kan awmphunga langsar ber pakhat chu Mizo thuam-a kan inthuam kha a ni a. Thil dang ah erawh chuan hmuhnawm thlir tum te pawh kan ang lek lek thung.

    NE States zingah hian Mizote Kut hi State pawn atanga min hriat sak loh ber leh Tourist hip lo ber a ni mai awm e. Kan thenawm State Manipur, Tripura leh Nagaland te; Meghalaya lai te hian an hnam bik Festival an nei vek a; chu Festival an hman hunah chuan State pawn chu sawi loh, India ram pawn atanga rawn chhimtu an awm nual thin a. Keini Mizote Chapchar Kut erawh hi chu State pawn atanga Kut hmang tura rawn kal chu sawi loh, kan State chhunga awmsa te pawhin min telpui an chak vak lo.

    Engvangin nge kan Kut te hian hriat a hlawh loh tih inzawt ta ila; chhanna tam tak a awm thei ang. Thil tam tak zingah chuan Hnam dang hnenah kan Kut awmzia leh ziarang hrilhfiah dan kan thiam lo a; eng nge anih an hre lo. A dang leh ah chuan Mizotawng hrethiam lo ten kan Festival rawn hmang ve mahse a hlutna pakhat mah an hre lo a ni. Programme kaihhruaitu Announcer emaw Anchor ten English an thiam lo deuh thin a; Mizotawng hmang lo te hnenah an hrilhfiah thei lo a ni.

    Thil dang leh ah chuan Publicity leh Information pek chhuah dan kan thiam tawk lo a. VC tlangau leh YMA Information chiah kan la hmang thiam a; Milem nena publicity pek chhuah kan thiam lo a ni. Hei vang hian Mizote Festival hian State danga atangin hriat a hlawh meuh lo a ni.

    Kan Hnam incheina hi a mawi em em a; mahse Hnamdangin Mizote ta ani tih an hre lo ang a; keini aia nalh leh mawi danglam in an design ang a; min neih sak mai ang tih pawh a hlauhawm. Chu chu tun hnaiah hian kan hre zeuh zeuh tawh. Entawntlak tak chu Naga te hi an ni. An hnam incheina leh Puan hian khawvel a deng chhuak tawh a; mi tu pawhin, khawi hmunah pawh hmu sela Naga Traditional Dress tih an hai lo. Mizote Traditional Dress erawh chu khawvel hian min la hriatsak lo tlat a ni.

    Nimina Chapchar Kut kan hman kha hlim takin kan tawp a; senso hautak em em in hun kan hmang a; mahse Kawnpui khawtlang bak a chiah phak lo a; hmaih kan neih chu - Publicity niin a lang. School naupang kha tello ta sela Kut hmang tur puitling kal khawm kan tam vak lo mai thei. Chuta tanga kan enlet tur chu publicity chungchang anih hmel.

    Tun aia ropui zawk leh hriat hlawh zawk hian kan Kut thei. Mahse tih dan thar danglam deuh kan zawna kan ngaihtuah a ngai thung. Mizote Kut hi tiropui tial tial tur chuan Mizote bawk hian ngaihtuahna kan sen a ngai ang.

    No comments

    Post Top Ad

    Post Bottom Ad