• Breaking News

    Ran thianghlim talh

    Hman deuh khan Kolasib-ah Vawk thi tawhsa chu saser pakhatin bazar-a zawrh turin a buatsaih a; mahse lo hre ru an awm avangin thuneitute hnenah an thlen a; Police te nen an chingfel a ni. Kha Vawk kha a rawn phur lut tu in man tlawm zawkin Saser pakhat hnenah a hralh a ni. Thuneituten hma la lo sela mipui te a lei tir ngei dawn a ni a, a lungchhiatthlak hle.

    Hetiang deuh bawk hian Zoram khaw dangah pawh sawi tur a lo awm tawh a. Mipui an thinur. Dik tak chuan sasertu khan khatiang Ran thianghlim tawk lo; hrisello kha chu mipui lei turin hralh chhuak duh lo sela, kan lawm tlang mai tur a ni.

    Kum kalta lamah vawk Pul hri a leng a; mi tam takin an Vawk tih ral an duh a; thenkhat phei chu Pul hri-in a man hman em aw.... tia inzawh zui deuh vawng vawng ngai te pawh a awm tawh a nih kha.

    Hetiang hunah hian Sasertu an pawimawh ber. A chhan chu mipui ten an Sa talh kha an talh hma-in eng ang nge a nih an rawn hre thei tawh lo a; bum theih tak kan ni. Vawkpui sa hi tuman an ei duh lo a; mahse saser rinawm lo deuh chuan Vawkpui sa pawh Vawkpui sa ni lo angin an sawi tlat a; Sa reptu te pawh an bang bik chuang lo.

    Vawk chauh a ni lo. Ar leh Bawng te pawh hian hri an vei thei tho mai a, Ar natna hri phei chu mihring tan a hlauhawm theih avangin sawrkar laipui thu angin State thenkhat ah phei chuan Ar an suat chiam tawh nghe nghe a nih kha.

    India ram khawpui thenkhat ah chuan Sa talhna hmun an nei a; chutah chuan Doctor ten an enfiah a; sa thianghlim anihna Certification an siam a. Mipui tan a him em em a ni. Keini erawh chuan chutiang taka enkawl Sa talhna hmun chu kan nei lo. Saser ten remchang an tihna hmun-ah an talh a; thenkhat phei chu an talh hma-a Ran dinhmun kan hriat miah loh te an ni.

    Sa hi a tui viau a; kan chawhmeh tha ber a ni. Mahse Sa thianghlim lo erawh tenawm tak a ni thung. Chutiang sa thianghlim lo chu Saser ten mipui min ei tir lo se a duhawm ngawt ang. Sa ser Association an awm a; an Association chhungah Sa thianghlim lo hralh chhuah chungchang pawh an inhrilh fo tur-ah ngai ila. Tilui te chunga action lak dan tur pawh tha tak an nei ngeiin a rinawm bawk.

    Sawrkar lam hotu Magistrate te chuan Sa thianghlim lo venna pakhat atan pawn lam atanga Ran lak luh te an khap thin. Mahse a ruka tilui duh an awm chuan ven hneh har tak a ni.

    Sa leitute chuan kan sa lei kha a hrisel leh hrisel loh kan hre thei tawh lo a; a talhtu a pawimawh ber avangin Sa talhtu zawng zawng te Sa thianghlim chauh talhin, Vawkpui sa pawh zep miah lovin sawi mai se mipui kan lungawi ang. Inbumna a awm erawh chuan mipui chu kan thinur viau thei a ni.

    No comments

    Post Top Ad

    Post Bottom Ad