• Breaking News

    Ramri chungchang sawiho

    Nimin khan CRPF Camp, Gharmura ah State pahniha District pathum Bawrhsap - Mamit, Kolasib leh Hailakandi leh SP \heuh  ten  ramri-a  remna leh muanna a awm theihnana thawhhona tur hrang hrangte an sawiho.

    Meeting-ah hian Hailakandi District Bawrhsap chuan State pahnihte inkara remna leh muanna a awm theih nana meeting buatsaih a ni chu lawmawm a tih thu a sawi a,  DC leh SP te chungah lawmthu a sawi.

    Mamit District Bawrhsap pawhin nikum lama MLA General Election hman zawh takah ramri depa awmte tan engmah buaina leh harsatna awm lova zawhfel a ni chu lawmawm a tih thu a sawi a, chutiang bawk chuan kan hma-a MP Election kan neih turah pawh ramri hrul a awmte tan harsatna awm lova zawhfel leh a beisei thu a sawi.

    Meeting-ah hian District Bawrhsap te chuan dan leh thupek kenkawhna kawngah dan bawhchhia an awm a nih chuan khawng takin thil tisualtute dap chhuah kawngah lung-rual taka kaltlan nise an ti a. Nikum maia Bairabi Border-a buaina chungchang sawi chhuah niin, ramri ve ve ah dan awmsa angin tuman kutthlak loh ni se tih a ni a, Assam lam ramri depah chutiang anga hmalakna a awm a nih chuan lo enfel nghal ni se tih a ni bawk.

    Meeting-ah hian kan hma lawka MP Election kan neih turah Bairabi khua kaltlanga, Assam Polling officials duty turte chu venhimna tha zawk pek nise tih a ni a. SP level-ah venhimna lamah ram pah-nihte inkara buaina awmlo turin Joint Patrolling leh Check Gate a tam thei ang ber siam nise tih a ni bawk.

    He hunah hian ramri chungchanga boruak ti chhe thei hrang hrang mipui vantlang zirtirna tha pek, dan lo anga damdawi tawlhruk chungchang, zu leh ralthuam hmanga dan lova sumdawnna leh pawisa lem hmanga sumdawnna tihbo kawnga hmalakna tur leh thawhhona tur hrang hrangte sawiho a ni.

    Meeting-ah hian Mamit, Kolasib leh Hailakandi District te atangin DC leh SP te bakah an hnuaia Officer pawimawhte an tel a ni.

    No comments

    Post Top Ad

    Post Bottom Ad