• Breaking News

    PWD-in Kawng siam that a hmanhmawh

    Kawnpui Dt. 8th Mar., 2019  : Kawnpui leh Buichali inkar National Highway siam that hna thawh mek leh Kawnpui leh Kolasib inkar kawng siam that hna thawh dan tur chungchang nimin khan Er  C Lalchhuana SE PWD leh Er Sanghrima EE PWD ten an enfiah a. Nimin tlai vek khan Kawnpui Venglai-ah NGO hruaitu leh VCP Kawnpui III te nen an sawiho nghal.

    Er C Lalchhuana chuan Khamrang leh Buichali inkar kawng siam hna thawktu te; Kawnpui leh Khamrang inkar kawng siam hna thawktute hnathawh mek dan a sawifiah a. Hnathawk dan siam danglam deuh a ngai dawn anih pawhin karleh lamah Chief Engineer te nen sawiho leh tur a ni dawn a ti. Er Sanghrima chuan rawtna mumal tak neih anih hnu-ah chuan Kawnpui khaw hnai lam hi siam hmasaka neih an duh thu a sawi a. Tunah pawh hian a khuar chhe zual lai chu hnawh mam a ni tawh a. Fur ruahtui tlak hma ngeia thawh zawh an tum a ni a ti.

    NGO hruaitute chuan mipui ten kawng tha an nghakhlel hle tawh a; Krismas leh Kumthar inkara Chief Minister in he kawng a rawn tlawh khan beiseina sang tak an lo nei hman tawh a; mahse beisei angin hna a kal chak tawk lo a; mipui an beidawng hman lek lek tawh thu an sawi a. Kawnpui - III VCP chuan Kawnpui leh Sairang peng inkar, khaw chhung phei chu lirthei tluang taka tlan a harsat tawh avangin an rilru a hmanhmawh hle tawh a ni a ti bawk. PWD Engineer te chuan Deptt ngei pawh a hmanhmawh a; hnathawh mek dan leh hmasawn dan an thlithlai reng a. An beisei anga a chak bik loh thu an sawi a. Chuvangin Deptt hotu lian te pawhin an ngaihven thar hle a; Contractor te nen pawh sawiho hmabak tam tak kan la nei a ni an ti.

    Er Sanghrima EE chuan NGO leh khawtlang hruaitute nena sawiho zel hi thil tangkai tak a ni a. Hmun dang ah pawh sawihona hmangin tluang takin hna an thawh theih phah a; complaint an neih pawhin an hnena thlen thuai nise, deptt chuan rang takin a bawhzui nghal zel ang a ti. YMA te nena thawhhona thuthlung an neih angin YMA leh NGO dangte hi kawng siamna-ah an pawimawh thin a. Deptt pawhin an ngaihdan hi a thlahthlam ngai lo a ti bawk.

    Nimin tlaia sawihona ah hian VCP Kawnpui - III te; Awithangpa Group YMA President te; Joint YMA Secretary te; Area MHIP President leh Area MUP President bakah YMA hruaitu dangte an tel a ni.

    No comments

    Post Top Ad

    Post Bottom Ad