• Breaking News

    Pakistan-ah JeM hotupa Masood Azhar a awm

    JeM
    Pakistan Foreign Minister Shah Mehmood Qureshi chuan nimin khan Jaish-e-Mohammad (JeM) firfiak pawl hmu chhuaktu Masood Azhar chu Pakistan ramah a awm tih a sawi.

    CNN-in an kawmnaah Qureshi chuan, “Pakistan-ah a awm. Mahse, ka hriat dan chuan a dam lo va, a \ha lo hle a, a in pawh a chhuahsan tawh ngai meuh lo,” a ti.

    Qureshi interview hi CNN bakah Pakistan media-te chuan an chhuah chhawng nasa hle a. India leh Pakistan inkara buaina chawk chhuak hnemtu a ni chunga Azhar an man loh chhan an zawhna chu chhangin, Pakistan chuan finfiahna, court-a kalpui tlak an duh vang niin a sawi a ni.

    India chuan JeM-ten tharum an thawhna leh dan an bawh chhiatna hi Pakistan sorkar hnenah vawi tam tak a thawn tawh a, mahse, Pakistan chuan hengte hi thu tling lovah a ngai lui zel a ni ber.

    February ni 14 khan JeM-te hian Central Reserve Police Force (CRPF) sipai sang hnih vel motor 78 a an kawng kal lai chu Jammu leh Srinagar inkar highway-ah lirtheia bomb kam hmanga beiin, sipai 40 chuang an thi a, eng emaw zatin hliam an tuar bawk a. He thil thleng hi JeM-te chuan an tih ngei a nih thu an puang a, mahse, Pakistan chuan finfiahna a la phut zel tho a ni.

    Qureshi chuan Pakistan ah chuan sorkar tharin rilru thar nen ram an hruai tawh tih sawiin, inremna an duh a, an ram chu sum leh pai bakah ei leh barah intodelh turin an duh a. Afghanistan-a kum 17 zet indona awm tawh pawh tihreh an duh tih a sawi bawk.

    No comments

    Post Top Ad

    Post Bottom Ad