• Breaking News

    Office dawrna-ah hian

    Officer lian ve tak pakhat chuan amah dawrtu hnenah ngam tlak takin ‘kan Office-ah hian thawktu eng emaw zat kan awm ve a; mamawh neiin hei i lo kal a; mahse i inthuamna chu a zahawm loh phian mai a; keini hi i thian te nimah ila; Office hi a zahawm a; laklawh thil taka inthlak hman lo i nih si loh chuan formal dress in Office rawn dawr la tun ai hian nangmah i zahawm deuh tur a nia...’ a lo ti a. A dik khawp mai.

    Nimin lawk-ah Rural Bank ah mipui mamawhtu an kal tam hle mai a. Bank hnathawktu te chuan a indawtin hming an lam zel a. Mi thenkhat chu an ding hnai khawm tuau mai a. Hnai taka an va awm avang khan an hming an lam hmasa pawh a ni chuang si lo a; thawktuten hming an lam te va kalna tur pawh awm lo khawpin an din hual a; a buaithlak hle a. Bank dawrtu pakhat chuan ‘a indawtin kan hming an lam tho a; va dinhual kher lo khan hmun thawl deuh i siam ang u...’ a ti a. Chu rawtna pawh chu a tha hle a ni.

    Kolasib District Office pakhat ah chuan Pisa dawr tumtu mi eng emaw zat an lo awm a. An zingah chuan kum upa tak mai, kum 80 hnaih thuak tawh, sam pawh tuak var va tawh hi a lo awm ve a. Officer a lo thleng a; chu Officer chuan ‘Ka pu, lo kal hmasa ber rawh, kan lo dawngsawng hmasa ber ang che...’ a ti a. Officer chhuanawm tak a ni. Kum upa te chungah zahna a lan tir kha a ropui. Chutih rualin mi zawng zawng kan inkian thei lo anih pawhin mihring ten kum upa (Tar) tia kan sawi thinte kan hnungah an awm chuan kian thiam ila a mawi hle bawk.

    Pisa thenkhat ah hian chuan intlar ngaih chang a awm a; chutiang hunah pawh chuan midang tih dan anga intlar ve mai hi ching ila. Thawktute kan hmelhriat that vang emaw, kan hmanhmawh vanga midang tih dan ang lova va tih tum te hi a dik ber ngai lo.

    Office dawr hi hmangchang hriat loh vanga chetsual palh leh nachang hriat loh chu thil thleng fo a ni a. Dem tur an ni lo. Mahse kan hriat phak chin leh kan theih ve chin ah chuan hawihhawm taka kan chet a ngai hle a ni. Mipui ten Office Staff te kan dinhual vak chuan thawktu tan pawh a luhai thlak thei. Hawihhawmna tel miah lova Office chhunga kan chet chuan midang tan harsatna a awm thei bawk.

    Chuvangin Office kan dawr hian midang chevel thlir hreh lo ila; kan hriat loh te zawt hreh lo bawk ila. Mizo rilru takin midang aia chuhhelh tum lo bawk ila. Chu chuan keimahni ah zahawmna min pe let zawk a ni. Zak thei lo taka chet bawrh bawrh te; tawngkam duh tui lo taka thil sawi te; mahni hmasial rilru deuh maia chet te hi kan tih loh tawp turah ngai ang.

    No comments

    Post Top Ad

    Post Bottom Ad