• Breaking News

    NGO Coordination Committee

    Mizoram khawtlang inrelbawlna ah hian NGO te hian dinhmun pawimawh tak an luah mek a; Sawrkar policy leh duh dan tihhlawhtlinna kawngah pawh NGO an pawimawh hle. Sawrkar Officer ten NGO te an hman tangkai thiam phei chuan kutke berah an awm thei. NGO te chuan mi leh sa an ngah a; mipui zah an phur bawk a; chu chu remchanna tam tak a awm.

    Kawng lehlama thlir chuan NGO te hi mamawh nawrtu leh diltu angin a ngaih theih. A chang phei chuan VC te tih tur niawm tak an lo tih chang a awm bawk. Chutiang hunah chuan NGO te inthlun khawmna Coordination Committee hi a pawimawh thin.

    Veng tinah YMA Branch te; MUP Branch leh MHIP Branch te an awm a; chung te chuan Committee hran theuh an nei a. Ngaihdan leh thlir dan hrang an neih chang a awm bawk. NGO pawimawh te hian anmahni huang chhungah chuan inthlunzawmna tha deuh an nei vek a. Mahse NGO zawng zawng inthlunzawmna erawh khaw tinah a awm lem lo.

    Hman deuh kha chuan NGO te hian khawtlang ah inrawlhna tur chin, an tihawm tak an hre viau thin. Mahse tunah chuan Committee hrang an nih avangin hruaitu zinga ngaihtuahna seng chak deuh leh zawiawi deuh azirin an dinhmun a danglam zung zung ta mai a ni.

    YMA Committee in a rel duh vak loh, NGO dang ten an lo rel tak mai chang a awm. Chhiatni thatni chungchang ah pawh YMA lam ngaichang lova NGO Committee pakhatin thutlukna lo siam tak mai te a awm ta zauh zauh a. Insawlsel hreh siin kan indipdal ta lek lek a ang.

    Mizoram Dist khawpui ah chuan NGO Coordination Committee hi a awm deuh vek tawh a; mahse Thingtlang khaw tam zawk ah erawh chuan a la awm lem lo. Pawl mal tin ten a hrang theuhin thil tha kan hriat ang kha tih tum ta zel mai la; ninawm leh nuam lo chin a awm thei. Mipui mamawh ngaihven kawngah pawh NGO ten a hrang theuhin thurel hran nei ta ila; hmalak dan kawngah insubuai a awm thei bawk.

    Thil hrang hrang han thlir hian NGO Coordination Committee hi neih a tul ta hle zawk a ni. Mahse mi thenkhat hian chu Coordination chu JAC ang deuha ngaiin sulsutu tur niin an ruat deuh tlat thei thung. Lungawilohna lan tir te; Total Bandh huaihawt thleng hian Cootdination Committee rawt turah an ngai ang tih erawh a hlauhawm thei.

    Pawl hmingah ‘Coordination’ anih angin thil insubuai thei leh pheikhai rual lo thei thil ah emaw, a huhova buaipui ngai ang chi an buaipui turah ngai ila. Sawrkar nawrtu emaw, Mamawh ngaittu ang deuha kan ngai dawn anih chuan ‘Coordination’ a nihna nen a inpersan zeuh zeuh thei a ni.

    NGO hrang hrang a lo tam tak-ah chuan Coordination neih chu a pawimawh khawp mai. Mahse a tih tur awm chin te; a buaipui tur awm chin te erawh mipui ten kan thliar thiam viau a ngai thung ang. Kan mamawh em em rual hian kan kalsual tir thei tho a ni.

    No comments

    Post Top Ad

    Post Bottom Ad