• Breaking News

    MP atana thlan tur

    India ram Inthlanpui kan hmachhawn mek a. Candidate te pawh kan hre nual tawh a; Mizoram in MP atana kan thlan tur chu pakhat chauh a ni chungin MP thlan chhuah te chuan India ram an kaihhruai dawn avangin pakhat lek thlang tur pawh nimah ila uluk a ngai hle tho mai.

    State hrang hranga Party ten Candidate an siam a; mipuiten kan duh kan thlang dawn a ni. Keini Mizoram atanga MP pakhat lek lo thlan chhuah ve hian India ram pumpui tan nghawng lian tak a nei phak lovin kan hre deuh a. Chuti tehchiamin kan rilru a luah thuk lo niin a lang.

    Mahse MP pakhat lek pawh hian pawimawhna lian tak an nei si a ni. Central ah Congress Party in sawrkarna an siam laia Foreign Direct Investment (FDI) chungchanga Lok Sabha ah Vote lak anih dawn khan MP pakhat pawh kha an hlu hle mai. Chutiang bawkin thu pawimawh tam takah vote lak a lo ni tawh thin a; MP pakhat lek hi an hlu em em a ni.

    Mizo mipui ten kan aiawha Parliament-a roreltu tur kan thlan dan turah hian kan tualchhung Politics hi dah tha thei ila a duhawm khawp mai. MNF Party Candidate emaw; Congress Party leh ZPM lam emaw hian kan rilru luah thuk lo se. Sawrkar laipui-a Party lian te hian Policy leh Principle an nei vek a; chu Principle chu Mizo tan a him tawk em tih lam ngaihtuah ta ila; chu ngaihtuahna atang chuan Vote thlak i tum ang u.

    Mizorama Political Party ten Candidate tura an rawn chhawpchhuah chin tawh chu tu pawh thlang tling ila; Parliament Rorelna hmun-ah chuan zahpuiawm loh tur tak an ni vek ang. Mizote hamthatna tur ngaihtuah a rilru seng mi tak pawh an ni ang. Tupawh thlang tling ila kan tisual thui lo mai thei.

    Mahse Mizoram Politics chian Central ah Policy Matter a khawih ve phak loh avangin Union Ministry-a Political Party te sukthlek tur zawk ngaihtuah daih ila; MNF Candidate emaw Congress Candidate emaw lam hian kan rilru luah lo se; Roreltu tur kan thlan tur hi Mizorama Rorel tur an ni lo a; India ram pum tana rorel tur an nih zawk avangin Mizoram chhung Politics thlirna lam aiin Central Politics thlirna nen Vote thlak zawk ta ila. a that zawk a rinawm.

    MP Election kan neih tawha candidate thenkhat phei kha chuan Central Politics an thlir phak lo deuh niin a lang. A thusawi leh ruangam an din ah pawh Mizoram a pel lo hle. Tun tum-ah hi chuan Pu Zoramthanga emaw Pu Lal Thanhawla leh Pu Lalduhawma te lam hi kan mit-in thlir lo ila. Prime Ministerial Candidate tur te sukthlek leh an Party Policy lam thlir zawk ang u.

    Mizo ten MP Election kan lak thu tak loh hle nachhan pawh Central lam Politics kan thlir thui loh vang a ni a; Mizoram tualchhung Politics rilru atanga MP thlanna Vote thlak kan tum anih chuan kan rilru in hmathlir a nei tawi tihna a ni ang. Chuvangin uluk takin kan MP tur hi i zawng ang u.

    No comments

    Post Top Ad

    Post Bottom Ad