• Breaking News

    MJA PRESS TOUR-IN SIKKIM-AH - R. Lalhmingthanga

    Mizoram sawrkar (I&PR Dept) chuan Mizoram Journalist (MJA) te tan NE State pathum Sikkim, Nagaland, Meghalaya leh Kolkata ah press tour min buatsaihsaka, district hrang hrang atangin pakhat theuh leh MJA Gen.Hq atangin 2 kalin, I & PR Officer ten Press Tour hi min hruai a, Keini Team Sikkim a kal te chu Jan 31 - Feb 4 2019 chhung khan MJA member 10 ten I&PR Dept Officer 2 hruainain Sikkim khawpui Gangtok-ah kan zin a ni.

    Sikkim hi tlangram, Himalaya bulthut a nih avang leh kan tlangmipui te chenna anih avangin tunhma atanga ka kal chak tawh thinna ram ani a, he hmun tlawh tura ka tel ve hi a tir atangin ka lawm in ka phur hle a. Lengpui Airport atangin Bagdokra Airport (Siliguri bul) thlenga thlawkin, kan hotu ten ruahmanna fel tak an siam avangin Airport atangin Sikkim I& PR dept in Tourist Car 3 in min lo hmuaka, chu Car changkangtak hmang chuan Sikkim khawpui Gangtok panin 4 Star Hotel, Royal Plaza Hotel ah zan dar 11:00 velah kan thleng ani.

    He Hotel enkawltu Gen. Manager leh a ho te chuan min lo hmuakin, duhsakna puanbah min lo hlan a, hei bakah hian hmundanga ka la tawn ngai loh, induhsakna atana Tuilum tui tak min lo in tir nghal vata, hei hian khawvawt lakah min chhawk nghal hle ani. Hotel changkang taka la thleng ngailo kan nih hlawm avangin kan Room tur chahbi (Smart Card) min pek atangin kan buai nghal chu ani deuh mai a, room chhunga kan chevel zawng zawng erawh chu sawi hrih lo mai ang.

    Sikkim hi zoram aiin an tlang a sangin a hriam zawk a. Kan thlen zana arsi emaw ka tih, sang taka eng sup sup te kha zing kan han thawh chuan Arsi ni lovin In a lo ni a, chutiang khawpa chhengchhia chu ni mahse, Mihring nuai 6.19 an cheng (2011 census) a, an khawpui ber Gangtok-ah pawh mi nuai 1 vel an cheng a ni.

    Sikkim hi kum 1975 khan Indian Union ah rawn lut ve chauh anni a, a hma chuan mahni a Lal hran neiin, ram rorelna hranin an awm thin ani. Tun dinhmunah a ram mi 61% chu Nepali an ni. A cheng hmasa Bhutia te hi 16%, Lepcha 13% vel an awm a. Heng bakah hian hnam hrang an tam hle bawk. An sakhua lian ber Budhism hi kum 1700 vel atang khan a awm tawha, Tunah hian Buddhist Monk-ho chenna Monasteries pawh 75 lai an nei. Nepali ten an chen pawlh hnuah Hindu hi an lian chak hle niin an sawi a, British Missionary te avangin Lepcha hnam engemawzat Kristian an awm ve bawka, tunah hian 10% vel chu Kristian an ni. 

    Gangtok khawpui hi Aizawl ang maia Tlangchhip bawh khua a nih avangin kawngpui zau tak chhuan tur an nei bik lova, nuamsa a motor inpelh theihna tawk a ni deuh ber.

    A tlangpuiin an khawchhung a fai em em vek a, chinai tahna hnuhma te, bawlhhlawh leh Polythene chihrang hrang khawlaiah hmuh tur a awm velo ani. An bazar vel thlengin Aizawl aiin an fai veka. An bazarpui ber MG Marg phei chu a nuam hle a. Kawngpui laitakah thut hahchawlhna tur engemawzat an daha, chuti chung chuan dawr nen a inkar ala zau em em a. A karah dawr phuahchawp Hawkers leh mahni remchan dan dana lo inphochhuak ve mai an awm loh avangin a thawl nuamin a fai a. khualzin tan bazar a nuamin a felfai hle ani. An Bazar M.G-Marg hi tunhma chuan taxi leh khualzin phur motor dinkhawmna a ni thin a, a tawp thei hle a, tunah chuan lirthei tlan phal a nih loh bakah an vawng uluk em em a, Aizawlah No Vehicle zone-a kan Bazar ang khan, ke a lenkual pahin ka bazaar suau suau ani deuh ber mai.

    Kawngpui kamah motor park hmuh tur a awm lova, a awm chhun pawh metal road rap lovin an compound chhunga park anni deuh bera, An Taxi te pawh kawng sirah stand pe lovin hmun hrang hrangah sorkarin Parking atan building a sak sak-ah an awm maia, chuta tang chuan a tlanchhuak duh chu an Service mai thin. Chuvang chu a ni mai thei, a kawng tet aiin traffic jam a tlem hle. Gangtok khawpui ah hian City Bus service a awm lova, Public transport chu Taxi ani deuh maia, amaherawh chu an Taxi fare erawh a sang uchuak ve lo ani. Kan zin chhunga ka rilru a lian ber pakhat chu, Gangtok ah hian In tinah Electric a enga, mitinin Phone leh Internet an hmang ve thova, amaherawh chu chunglamah hrui inzam hnawk a awm ve lova, hei hian khawpui a ti felfai em em ani.

    Gangtok khawpui kan cham chhung ni 3 chhung hian hmun pawimawh tak tak kan tlawha, sorkar mi pawimawh tak tak ten en hunk an hmangho bawka, Mizoram tan entawn tur tamtak (abikin Tourism hmalakna ah) hmuin kan inhria a ni.

    An hnam thil phochhuah leh tih hmasawna lam an ngaipawimawh tih hriat takin, Keinin Industries Dept hnuaiah Wing pakhat ang leka kan neih Handicraft & Handloom hi Department pakhatah an nei a, an Office te ropui em em lo mahse an hmalakna hmuh tur a tam hle a, Museum hranpa neiin, a pi leh pu te kuthnu leh an hnam tihdan hrang hrang kan hmuh te chu Mizo te nen inang tamtak hmuhtur a awm a ni.

    MLA Election an hnaih tawh avangin Chief Minister hi campaign in a zin bo lai ani a, CM ber hmu theilo mah ila, Chief Secretary Mr Alok Kumar Srivastava IAS chuan Feb ni 1 khan Secretariat building thar changkang takah inkawmna hun minsiamsak a. An Secretariat hmasa kha 2011 a lirnghing khan a tihchhiat avangin New technology hmanga sak(an ti deuh kher) Secretariat building thar, Minister-ho bakah Secretary leh Director-te an khungkhawm vekna ah chuan inkawmna hun nuamtak kan hmang ani.

    Chief Secretary hian an state chu Kawlphetha-ah an intodelh thu te. An lui neih len ber Teesta chu hydel project atan hmun hrang hrangah an khuap chhawng thluah a, he Lui atang ngawt pawh hian MW 1200 an siam thei a, hei bakah hian Chuzachen leh Rangit III HP an neih atangin Kawlphetha Mega Watt 2206 an siam chhuah thu a sawi a. An hman bang an hralhna pawh kum tin cheng vbc 190 a nih thu a sawi ani.

    Hemi ni vek tlai lam hian I&PR Secretary Pi Sherap Shenga leh IPR Director Pi Parinita Lama te kan kawm bawka, phut zawk zawkna tur a tam hle. Office building changtlung tak an nei a, Secretary leh Director office a awm nghal bakah I&PR Minister in chutah chuan Office hran a nei a, hei hi ama office pangngai bakah I&PR hnathawhte a hmuna enpui leh vil a duh changa a hman turin an ruahman a ni.

    District I&PR Office tinte chu District Info & Public Relations Officer in an thutchilha, an thachhangdawltu Senior Information Assistant leh Junior Information Assistant te, Videographer pahnih leh Photographer pahnih an awm zel a, clerical staff nen an vaiin a tlem berah staff 12 tal an awm.         I & PR Directorate-ah chuan Archive Section, Photo Section, Film Section, I.T Section, Media Section, Publication Section, Advertisement Section, Accounts Section leh Administrative Section-te an nei hrang vek a, Deputy Director ten chan bik neiin an vil a ni.

    Library changtlung tak neiin Publication-ah an chak em em a, tunah hian lehkhabu 120 chuang an tihchhuah tawh bakah thlahnih dan a chhuak Magazine  Sikkim Today an nei a, Nepali edition in Paddhwanian tichhuak bawk a, hei hi India rama Chief Minister zawng zawng, Central & State Minister zawng zawng, New Delhi leh Kolkata a Foreign Embassy zawng zawng, Sikkim a School, Sawrkar pisa, NGO, Village Panchayat te an pe thin a ni. Hei bakah hian IPR Dept chuan bi-weekly magazine & Sikkim Herald an tichhuak bawk a, hei hi English leh Nepali a an tihchhuah bakah State chhunga hnam bil tawng chi 11 in an tichhuak a. Chu chu a thlawn veka sem a ni.

    Recording Studio changtlung tak an nei a, sawrkar press release leh sawrkar hmalakna chi hrang hrang te video recording an ti thin a, hei hi Cable TV te zingah a duhin an lak bakah social media-ah facebook leh Youtube ah te bakah anmahni I&PR mobile apps kaltlangin tihchhuah thin a ni.

    Sikkim I&PR Secretary pi Sherap Shenga-i sawi dan chuan Journalist pension scheme hi sorkar kumthar atanga pek theih turin hma an la mek a, hemi atan hian Criteria fel takin siamin, 'Sikkim mi an nih loh chuan a tlem berah Sikkim-ah journalist hna kum 20 tal thawk tawh an ni tur a ni' tih te, kum 55 chin chunglam pek theih te, Sikkim Press Club-in an recommend te chauh pek theih a nih thu leh, thla khatah Rs 5,000/- a pek phawt an tum thute a sawi.

    Mizoram sawrkarin Journalists' Welfare Society min siam sak dan leh damlo tanpuina leh kan inralna te ang erawh an nei ve lo thung a ni.

    Sikkim sawrkar hian an chanchinbu mite chu nasa taka tang turin an tiphur thiam hle. Chumi atan chuan award-te pawh an siam a.
    Chung award te chu -
        1.    Positive Journalism Award : Hei hi kum hnih dan zelah an thlang a, pawisa fai 50,000/- a keng tel.
        2.    Lifetime Achievement Award : Hei hi kum hnih danah an thlang a, chengnuai 2 an pe thin.
        3.    Rural Areas Journalist Award : Thingtlang lama Journalist, hnathawk thate hnenah he award hi an pe a, a pawisa hi Governor-in a tum sak (Sponsored by Governor) thung a. Lawmman pawisa fai cheng nuai 1 a keng thung a ni.

    February ni 2 khan Sikkim sorkar hmalakna ropuitak mai Hospital changkang em em tur building ropui zet mai, an luah tanchhoh mek 'Multi Speciality Hospital' kan tlawh a. Khum 1000 awmna tura duan a ni. He Hospital-a Department tin hi Super Specialist ten an awp dawn a. Sikkim sawrkar chuan heta thawk tur hian an khua leh tui (Sikimmese), India ram hospital lian- Apollo leh Amri tih vela Super Specialist te chu thla khatah cheng nuai 5 hlawh turin a ko haw hlawm a ni.

    Sikkim Press Club (Journalist Association) chu Feb ni 2 ah kan tlawh a. inkawmhona hlimaw tak kan hmang. Gangtok ah hian Journalist member hi 100 vel an ni a, a zatve dawn hmeichhia an ni. Gangtok-ah chuan daily news paper 11 an nei a, magazine tlem a awm bawk.

    Sikkim Press Club te hian kan hma lawkah hian NE Journalist te kohkhawmna atan an state sawrkar sensoin Journalist seminar koh an tum a. Hetah hian North East Journalist Forum din an rilruk a ni. Mainland ten NE mite min en hran dan te leh thil tih ho ngai a awm a, tanrual theihna tura inhrualmum ve an rilruk tih an sawi.

    Hemi atan hian State tin atangin Journalist pahnih theuh chah a, chungho kal leh hawnna thlenna senso zawng zawng pawh an state sawrkarin a tum vek tur thute an sawi a. State dang pawhin chu chu chhunzawm a, thleng kual den den thei ila tih ngaihtuahna thatak an lo nei ani.

    Hmundang atanga Sikkim kan lo hmelhriat dan tlanglawn ber chu Tourism hi ani a, chutiang chiah chuan Sikkim hi tourism -ah hian an sang em em a, Khawvela Tlangsang te zing ami Mt Kanchenjunga lan theihna hmun anih avang te, Nathulla Pass (China border) leh hemi panna kawnga Tsongo Lake, Frozen Lake an tih mai te chu Vur in a khuh thin avangin, heng lai hmun te hi khualzin te hip tu ber ni mahse, heng te hi remchangah hmangin khualzin hipna turin hma an la nasa em em bawka, Sorkarin Tourist Lodge Building an neih kan hrelo na a, khualzin te thlenna tur Hotel changkang tak tak a tam hle bawk ani.

    Thlasik vur tam laia kal kan ni bawk a, ka tlawh chak ber China ramri 'Nathula Pass' chu kan thlen an phal lo a. Tsongo lake chauh kan thleng thei nain, chutah pawh chuan tourist an tam hle a. An tuikhuahte chu vurin a khuh bo vek a. Khualzinte hipna turin ropeway an lo dah leh zel a. Mi pakhat chuan manah ` 325 zel an la a. Chu ropeway hmang chuan a chhak tlang sang ft 12,700 a sangah kan han chho a, hawina lam apiang hi vurin a khuh var vo Tlang mawi tak tak vek a ni a, a ropuiin a hmuhnawm ngei mai.

    Tourist hipna tur hi an ngaihtuah chhuak thiam em em mai a. An motor kawngpui inthlep kual vel ringawt te pawh, mi lungleng mite tan chuan hla a phuah tham khawpa hmuhnawm leh tlan nuam a ni zela. Thing leh mau an zuah nasa em em a. Kham karte chu a chhawkhlei a tam em em bawk a, a han par tak tak chu, a kal a piangte sawi a tling a ni awm e.

    Tuikhawhthla min enpui an tum a, Gangtok atangin an Chite lui lamah kan chhuk ngat ngat mai a, mak tak a ni. An khawpui thli te chu lakhawmin tuikhawhthla ft 50 emaw vel chauha sang hi a lo awm a. A hoh viau laiin a ho lo viau bawk a ni. A bul velte chu an chei mawi a, lawngleng chuan theihna tuikhuah te, adventure-ho hip turin hrui zawhkai tur te an dah bakah, chu luitui hmang chuan chulai hmun chawm tur lekin mini hydel project an siam bawk a, Tlangram tih takah Para Glyding ringawt pawh thenkhat tan chua eizawnna tham a lo tling der bawk.

    Kan sawi tel hram duh chu, Sikkim-ah hian MLA constituentcy 32 a awm a. National Party BJP leh Congress tih vel hian awmzia an nei pha ve lo. An Chief Minister Pawan Kumar Chamling (kum 69), Sikkim Democratic Front (SDF) dintu hi term 5 lai a CM zawn tawh a. hei hian hruaitu tha leh ram hmasawnna tak tak thlen thei tu chu mipui ten an chhangkham mai mai lo niin alang.

    Heng ka han sawi tak zawng zawngte hi, mahni usm seng chuan engtikah nge kan kal ve ang tih kan ngaihtuah phak loh ni mahse, Mizoram sorkarin Journalist te hmakhua ngaia, min duhsakna vang ani a, chuvangin he Tour hian keimahni chauh nilo, ram leh mipui, he thuziak lo chhiar ve tu te tan hlawkna tlem tal a nih ka beisei a ni.

    No comments

    Post Top Ad

    Post Bottom Ad