• Breaking News

    Khawhar lenpui

    Mizoten thihna kan tawh changa kan intanpui tawn dan hi hnam dang te hmuh ah pawh entawn tlak leh mawi tak a ni. Thihna a lo thlen veleh Nula tlangval leh tlawmngai an kalkhawm a; tih tur pawimawh an ti zung zung a; Lumen ngai anih pawhin Nula tlangval an kal leh a. Thlanlaih leh thingpui lum a lo hun a; Nula leh tlangval bawk an che chhuak leh a. Zan lamah khawhar lenpui a ngai a. Nula leh tlangval bawk an che chhuak leh a. An hah hle.

    Chhiatna lamah hian nula leh tlangval an hah fal zual ta lutuk deuh a; Nu leh pa te; Pavalai leh Nu valai lam hian Mitthi vui huna len bak tih tur nei lo angah kan inngai ta deuh niin a lang.

    Khaw thenkhat ah chuan Ruang thlak zan hi Nu leh Pa chan ang deuhin an dah a; Khawhar lenpuina ah Nu leh Pa an kal tha viau. Keini ah chuan khawhar lenpui zawng zawng chu Nula tlangval tih tur ah kan dah deuh ta mai a. A bik takin YMA hruaitu te tan phei chuan a hahthlak lutuk deuh tawh a ni.

    Chhungkua leh kan khawsakna ah chhngkaw thil te; Pawl leh Kohhran thil pawimawh tam tak a lo awm a; chutih hunah chuan nula tlangval te hi a pawimawh kan ni leh a. Khawhar lenpui ngai an lo awm chang hian an tan a hahthlak zual deuh ta niin a lang.

    Mitthi chhungte thlamuan leh lenpui hi veng chhung mi zawng zawngin kan tih turah kan ngaih loh chuan mi thenkhat tan phurrit a tling thuai mai dawn. Chuvangin Ruang thlak zan hi chu Nu leh Pa ten an chanpual ah dah thiam se a duhawm hle.

    Dik taka sawi chuan Nula leh tlangval te hian pawimawh leh tih tur an lo nei ve a; chutih hunah chuan khawhar In lama YMA hruaitu te rilru a lo hah hman thin. Ruang awm laiin Tlangval in Thlan an lai a; an Vur nghal bawk a. Nula ten Thingpui an buaipui a; nilengin awl hun an nei mang lo. Zan lama Khawhar In a kal leh nghal tur te; zan dangah pawha kal zel tur anga rilru an pek chuan hun an ui ve thin.

    Khawhar kan lenpui dan kalhmang hi mipuite te hian siam danglam thei ila. Ruang thlak zan hi chu Nu leh Pa ten an chanpual ah ngai thei sela; mitthi chhungte lenpui chungchangah pawh kan phei khai a rual deuh zawkin a rinawm.

    Tunlai-ah chuan Pavalai tlawngawl tak tak, Nuvalai tlawngawl thei tak tak, zan khat lek Khawhar lenpuina lama hun pe thei tur an tam tawh a; rawtna emaw a awm loh vang mai niin a lang. Veng tinah hian YMA hian hetiang rawtna hi rawn paw chhuak thei sela; Mitthi sawngbawl chungchang ah pawh kan tang tlang zawkin a rinawm bawk.

    No comments

    Post Top Ad

    Post Bottom Ad