• Breaking News

    Kawng sira thil dah

    Kum eng emaw chen kalta atang tawh khan kawngpui kama bungrua leh thil dang dah hi a mawi lo tih kan inzirtir tawh thin a. A chang phei chuan khawtlang neituten chhungkaw mal hnena ngenna an siam ta hial te pawh a awm a ni. Mahse vawiin thleng hian kawngsir-a thil dah kan la sim thei chuang lo.

    Motor in thing kan phurh tir a; kawng sir hnai takah a dahkhawmna tur kan ruahman nghal ri ngawt a; mahni compound chhung, Huan lam leh kawm thlang lama dah theih reng kha tumna kan nei miah lo a; kawng sir ah kan dah ta mai. Lung leh Rawra te kan lei a; chu pawh chu kan Huan lamah a dah theih reng chungin kawng sir hnai ah bawk kan dah leh a; kan that chhiat vanga dah fel peih lo nge kan nih a nachang kan hre lo zawk.

    Iron Rod te; Bricks te kan lei a; chu pawh chu Huan chhung-ah vantlang hmun nilo, mimal hmuna dah ai chuan vantlang hmun-ah bawk kan dah khawm a; dik tak chuan zirtir kan har ve khawp a ni. Kawng sira thil dah ho hi han belchiang deuh ila; an kawmthlang ah emaw, an Huan lamah emaw chuan chung an thil dah te chu seng hawi theih a ni deuh zel. Seng hawi kan tum loh vang a ni thei bawk.

    Sub Division Magistrate chuan hetianga kawng kama thil dah hi a duh lo a; chutiang bawkin veng tina Sanitation Committee pawhin an duh lo a; VC leh YMA tlangau hmangin an puang a. An thu puan a rin that teh lul nen, kawng sira thil dah tu chuan chet lak a tum chuang miah lo. Thuneituten Dan angin action rawn la dawn sela; thinrim anchhia leh tawngkam duh hlawk hlawk kha an ni leh awm si.

    Khawpui pawh kan la ni chiah lo a; kan In dinna bak compound pawh kan nei deuh vek a; kan mamawh atana kan bungrua lakkhawm reng reng kha kan Huan chhungril lamah te; kawm thlang lam ah te seng hawi dan ngaihtuah ila. Vantlang kawng sir ah engmah dah miah loh kan tum chuan kan thei a ni. Chutiang tur chuan chhungkaw tin te inbuatsaih teh ang u.

    Dik tak chuan dah thatna tur kan neih sen loh khawpa tam hi kan leikhawm meuh lo. Vantlang kawng sir lam kan tihnawk vak a; kan Huan leh kawmthlang lam a awl diai duai thung si a. Kan rilru-ah seng hawi tumna kan neih chuan kan bungrua te hi senghawi tham lek an ni hlawm.

    VC leh YMA Tlangau ten Kawng sira thil dahtu zawng zawng in seng hawi tura min ngen leh hun hun ah kan chhungkua chuan thupuan ngaithla liam mai lovin, senghawi hna i thawk ang u. Veng hmasawnna tur pawimawh tak pakhat a ni e.

    No comments

    Post Top Ad

    Post Bottom Ad