• Breaking News

    Hnam Lam

    Mizo zingah Hnam incheina leh Traditional Dress lam hi chuan hmun a luah thuk viau tawh a; mahse Hnam Lam (Traditional Dance) lam hian hmun a luah thuk lem lo. Mizo Hnam Lam ai chuan Western deuha lam te; Korean deuh a Lam te hian hmun a luah thuk zawk tawh a ni. Mahni Hnam Lam ngaisanglo nih chu tuman an duh lo a; mahse Hnam Lam thiam tuma zir erawh an tlem hle.

    YMA chuan Inkhawmpui a hmachhawn mek a; chutah chuan Hnam Lam intihsiakna tur pakhat a tel a; Branch thenkhat ah chuan YMA member Hnam Lam zir tur an awm mang lo niin a lang. Member 300 chuang nei Branch pawhin Hnam Lam zir tur mi 20 tak ngial pawh a hmu zo lo deuh thaw ta mai a. A pawi hle.

    Kan Hnam Lam hian kan thinlung a luah thuk zo lo deuh a ni. Thalai zingah mahni Hnam Lam engmah thiam nei lo nih te hi zahthlak a tling thei. Chutih laiin mi thenkhat chuan thiamlo nih chu hlimpui nan an hmang hlauh thung a; zah nachang an hre lem lo. Mahni insawisak nan an thiam loh leh zei loh an sawi hreh lo a; ngaithlatu zingah mahni Hnam Lam thiamlo nih hmusittu an awm tih lam an ngaihtuah lem lo a ni. Mizo dik tak chuan mahni Hnam Lam thiam lo nih an duh hauh lo.

    Kan chhehvela kan Tlangmi (tribal) nihpui te hian Hnam Lam chi hrang an nei ve tho a. An Thalai te chuan Hnam Lam thiam lo nih an zak zawk. Kut ni Vangthla a lo thleng a; Hnam tan ni pawimawh a lo awm a, chutih hunah chuan Hnam Lam entirna ah tel ve ngei an tum tlat thin. Mizo Thalai te erawh chuan tumna rilru kan nei miah lo hi nakina kan la inchhirna tur a ni mai thei.

    Mi thenkhat chuan Hnam Lam te hi Thalai zinga lehkhathiam lo leh zirsang lem lo te thiam turah kan dah ringawt a; Nula Tlangval rual pawl vak lo te zir turah kan ngai deuh a. Kan hmuh dan a dik lo a ni.

    Mizo Hnam Lam hi YMA chauhin a buaipui turah kan dah deuh ta bawk hi kan tihsual a ni. NE States zinga Hnam thenkhat chuan Kohhran Thalai inelna atan te an buatsaih a. Kohhran thil tih leh Thalai inelna atan te pawh an Hnam Lam an hmang a. An chawisang thiam hle.

    Mizote pawh hian Kohhran Thalaite inelnan te, KTP Group intihsiaknan te hmang ve thei ila; tun ai chuan Hnam Lam kan thlir dan a fuh zawk ang. Tuna kan tih dan phung ah ringawt hi chuan Mizo Hnam Lam hian hniam lam a pan deuh zel dawn niin a lang. Chuvangin YMA chauh ni lo; Kohhran te pawh hian ngaihtuahna zau zawk i hmang teh ang u.

    Mizo Puan leh thuamhnaw lam hi chu kan chawilar thiam viau tawh a; kan Hnam Lam mawi tak te hi kan la chawi lar thiam tawk lo deuh a; Thalai rilru a la luah hneh lo deuh a ni.

    No comments

    Post Top Ad

    Post Bottom Ad