• Breaking News

    Hausak nghal tum lovin

    Mizote hi rilru hmanhmawh tak kan ni tiin kan sawi thin. Thlirna pakhatah chuan a dik mai thei. Thil dang ngaihtuah lovin kan Huan thlai chin atang hian han chhût hmasa ila. Thlai kan ching a; mithiamten sum tam tak a thawh chhuah theih dan an sawi a. Chu chauh chu kan hria a; hausak nghal tur emaw kan ti mai.

    Hman-ah khan Tung thing te; Kangdamdawi te; Sapthei te; Thingfanghma te kan ching tawh a. Bul tan nan Deptt in a enkawlna tur pawisa min pe a; mahse kan beisei a ang lova; kan hlawhchham leh mai thin.

    Tun hnaiah Red Oil Palm kan ching leh a; Coffee kan ching bawk a. Kuhva kan ching chhunzawm leh a. Kan hun tawn tawh atangin tawn hriat nei tawh awm tak kan nih laiin kan beidawng hma leh hle.

    Red Oil Palm ching tura Godrej Company leh Agriculture Deptt in bul an rawn tan tirh pawh khan hausakpui nghal turin thu min hrilh reng reng lo. Eizawnna nghet turin min hrilh chauh zawk a ni. A enkawlnan sum leh pai min pe a; hmanrua min pe bawk. Mahse kan rilru a beidawng thuai a; tihrem kan duh leh ta hial a ni. A hriak sawrna khawl min bun chilh a; hralh theih loh a awm lo. Min lei sak nghal char char a; mahse kan rilru a beidawng tlat a; kan zuai leh zo ta a ni.

    Coffee Board in Coffee ching turin min ti leh a. Pawisa te min pe. Tichuan kum eng emaw chen kan ching a; a thar tan dawn chauh a; kan beidawng leh a. Kan rin aiin kan hausak phah lo a ni mai thei. Coffee hralhtu te hian pawisa an ti riral miah lo. Mahse beidawnna rilru nen kan thlir tlat avangin kan tui zo leh lo a ni.

    Kuhva kan ching leh a; a rah seng tur a awm tan dawn chauh a; kan rilru in Thlai dang a hlawk zawk dawn niin kan hre leh tlat a. Hah takin Kuhva enkawl puitlin tuma kan lo thawh tawhna zawng zawng kha kan tithuanawp leh a. A pawi hle thin.

    Dik tak chuan heng Thlai te hi hausakpui theih a ni. Mahse hausakpui tur chuan teirei peih a ngai. A tir lamah chuan eizawnna zinga pakhat angin ngai ila; a lo rei deuh hnu-ah kan thar chhuah pawh Buara Bag zawnga chhiar lovin Quintals ang zawnga kan chhiar theih hunah kan hausak pui ang. Chu chu kan nghak peih lo deuh thin niin a lang.

    Sawrkar-in Policy thar dang pawh a rawn chhawp chhuak leh mai thei. Hah taka kum 5 chuang zet kan lo enkawl tawh kha thil dangin thlak sek tawh lo ang u. Tunah chuan eizawnna pakhat angin ngai ila; kan ngah hunah hausakpui tham a lo awm mai dawn a ni. Vawiina hausak nghal kan tumna hian beidawnna min siam awlsam a; rilru nghet neih i tum teh ang u.

    Rilru nghet kan neih loh chuan hah takin bul kan tan tha reng a; harsa leh thawkrim reng rengin kan dam chhung hun kan hmang zo mai ang.

    No comments

    Post Top Ad

    Post Bottom Ad