• Breaking News

    BJP thawhpui leh thawhpui loh

    MP Election dawn avangin Candidate leh Party ten Campaign an bei ngawrh hle a. Campaign auhla ber pawh Citizenship Amendment Bill leh BJP thawhpui leh thawhpui loh a ni deuh mai. Candidate te thusawi hrang hrang han ngaithla ila; CAB chungchang an thupui lian ber a ni a. Political Party te thusawi han belchiang deuh ila, BJP thawhpui lo zawk nih an inchuh a; an khingpui te chu BJP thawhpui zawk niin an puh a. Kan Political Campaign auhla chu a la hniam hle tihna a ni.

    Mizoram mipuite hian BJP thawhpui leh thawhpui loh chungchang bak hi sawi tur kan hre lo nge maw ni ? MP Election Campaign neih mek han thlir hian kan thu ngaihthlak te hian hmasawnna kawngro a su thui lo hle niin a lang.

    Central sawrkar-a kan aiawh tur leh Rorelna sang bera Mizoram aiawha tel tur kan thlanna tur ah hian hei aia Politics auhla lian leh ram hnuk khawih zawk hi a awm lo emaw ni le. Mizoram State tana pawimawh leh hmasawnna rahbi lian tak tur Look East Policy leh a kaihhnawih chungchang sawi a awm miah lo a; chhim lama insumdawntawnna kawng pawimawh tak tur Multi Modal Transport chungchang sawi a awm bawk lo a; Mizoram State chu Central Sawrkar laka Special Category kan nih zel theihna tur sawi a awm bawk lo a; kan ram leilung hausakna haichhuah kawnga Company te nena kan indawrna hi tun aia Mizoram mipui tana chhenfakawm zawk tur rawtna sawi a awm lo bawk.

    Mizo mipui te hian State sawrkar hnuaia hna ringawt kan inchan tawh lo a; Thalaite tana unemployment Problems sutkian nana Firms leh Corporation (hna siam thei tur) sawi a awm hek lo. Tuna kan candidate te hi tupawh thlang tling ila; BJP thawhpui emaw Thawhpui loh emaw ang leka buai an nih chuan MP chak kan neih chuan loh hmel. CAB chungchang pawh a pawimawh a ni. Mahse Parliament House-a ah vawi khat Vote lak anih chuan zofel mai tur a ni a; kum 5 daih a ni lo.

    MP atana Candidate mimal tin hi han thlir ila - Mizoram leh India mai ni lo, International Level thlenga mi hriat lo ni ve tawh thin. An kalna kawngah chuan Indian Republic Represent te pawh lo ni tawh an ni a; an chhuanawm em em vek a ni. Tu emaw ber pawh hi tling se, kan tisual tam pui lo ang.

    Mahse mipuite hnena an hmachhawp leh thlirna min hrilh thin chu inpuhtawnna ani ringawt mai a. Hmasawnna Policy a la awm lo. Hetiang ringawt anih chuan midang thlan tur awm si loh vangin anmahni tu emaw ber chu kan thlang tling dawn a ni si a. Lung a si zan lo deuh.

    Candidate leh Political party te hian inpuhtawnna politics hi duh tawk tawh sela; Parliament member an nih huna Mizote tana hmasawnna tur kawng an lo sial min hrilh tawh se a duhawm hle. Mipui ten thu ngai hlir hi kan ngaithla rei peih mang lo a ni.

    No comments

    Post Top Ad

    Post Bottom Ad