• Breaking News

    Bialtu MLA hovin Chapchap Kût

    Kawnpui Chhimveng Branch YMA
    Kawnpui Chhimveng Branch YMA
    Mizoten hmun hrang hrangah nimin khan Chapchar Kut kan hmang a; Aizawl ah chuan Pu Zoramthanga Chief Minister chu Kut Pa niin Pu R Lalzirliana Art & Culture Minister chu Kut Thlengtu a ni a; Kolasib ah chuan Pu K Lalrinliana Minister chu Kut Pa niin Pu Zoengsanga DC chu Kut Thlengtu a ni a.  Vairengte ah chuan Pu Lalchhandama Ralte Minister chu Kut Pa niin Pu Lalrinsanga Ralte Bialtu MLA chu Kut Thlengtu a ni a. Kawnpui-ah chuan Pu Andrew H Thangliana Bialtu MLA chu Kut Pa niin Pu J Lalthafamkima CO 1st IR Bn chu Kut Thlengtu a ni.

    Joint YMA buatsaiha Chapchar Kut hmanna Awithangpa Hall tual-ah hian Pu Lalnunsanga Joint YMA President chuan Kut Programme a kaihruai a. English Medium School 3 ten Hnam lam an entir a; Higher Secondary School in Costume Parade an entir bawk a; Branch YMA items tura Committee in a ruat erawh tihlawhtling thei lo Branch an awm nual a ni.

    Kawnpui Chhimveng Branch in hmanlai lal leh milian te an thih hnu-a an ruhro dah that duh vanga an taksa a tawih ral thlenga Kuang an Ur dan leh Ruhro an dah that dan an entir a; hei hi tun laia hmuh tur awm tawh lo leh Thangthar tam zawkin an hriat tawh loh a ni a; ngaihsak a hlawh hle a ni. Hei hi kum dang zawng aia kumin Chapchar Kut danglamna zinga pakhat a ni nghe nghe.

    Pu Andrew-a Kut Pa chuan thusawiin ‘Khawvelah hian hnam khat ni si, inpumkhat lote chu an ral thuai a, hnam inhlawmkhawm tha leh inpumkhatte erawh an ding chhuak thin; an aia hnam lian leh chak zawkte lakah pawh an inpumkhatna chuan hnehna a chan tir thei a ni’ a ti a. ‘Kumpinu sorkar policy ‘divide and rule’ tuar nasa berte chu Zohnahthlak te kan ni, ram pathum heng India, Bangladesh leh Burma ah te hian thendarh kan ni a, India ah phei chuan state pali Mizoram, Manipur, Assam leh Tripura ah te kan awm darh a; Chuti chungin kan inunauna leh thisena kan inzawmna te hi a bo chuang lo’ a ti. Kut Pa chuan eng hunah emaw Pathianin Mizo zawng zawng te chu Rorelna huang khat hnuaia min awm tir a beisei thu a sawi bawk.

    Nimina Chapchar Kut ah hian Pu J Lalthafamkima Kut thlengtu chuan ‘Hmanlaia Chapchar Kut an hmanna ah chuan lal in mihuaisen leh chhunawmte hnenah Zu a pe a; an in thin. Mahse vawiin ah chuan mipui in kan thlanmuanpui lem loh leh chhuanawm kan tih lem loh ten Zu an rui ta a ni’ a ti a. Chapchar Kut avanga Mizote nun nghehzia leh rinawmna a sawi bawk. Pu H Lalmuanpuia President Awithangpa Group YMA pawhin thusawiin ‘Tunah chuan Mizote Kut hi Kristianna rilru nen kan hmang thiam ta a. Mahse YMA chauhin bul a tum thin hi a la tawk lo; NGO dang te leh Kohhran te nen kan buatsaihho theih hun nghak chhuak tawh ila. Kan Kut hi State pawn lam Tourist te a la hip zo lo a; kan chhehvel State a chengte kan la tluk lo deuh a ni’ a ti.

    Awithangpa Hall tual-ah hian Kut hmangtu an tam hle a; a tirah Khelmual lama hman turin ruahman nimahse Khelmual a diak a; chawpchilh takin a hmun hi sawn thut a ni ta zawk a. Prog tan tirh lamah Sound a fiah tha tawk lo a; mahse Sound System in a mamawh tawk ang Power Supply a hmuh hnu-ah erawh chuan a zia-awm viau tawh thung.

    Nimina Chapchar Kut senso tur hi Pu Andrew H Thangliana Bialtu MLA chuan Joint YMA Kawnpui kutah a pe a; Joint YMA hruaitute an lawm hle.

    No comments

    Post Top Ad

    Post Bottom Ad