• Breaking News

    Zu khuahkhirh - Article

    Kum eng emaw chen Mizoram Sawrkar hnuaiah phalna neia Zu kan zawrh hnu-ah sawrkar a inthlak a; Zu chu Dan hmanga khap tumna a lo awm leh ta a. Zu zawrh phalna la hlip chiah lo mahse sawrkar in Dry Day a puan avangin hralh chhuah theih a ni lo a. Khuahkhirh angin a ngaih theih rih.
    Kum tam tak chhung Zu kan khuahkhirh a; mahse Zu a rem chuang lo. Zu in duh kan la tam vang a ni mai. Zu in duh ten zu tha an in theih nan tiin sawrkar in Dan hmangin Zu tha a zuar a. A thu ah chuan a that hmel hle. Mahse Zu dawr neitu ten hralh chhuah tam an duh vang te; hlawkna tam zawk an um vang te; Zu Permit leh Card chungchang ah kan inthlahdul avang te; duh tawka Zu in thei nia kan inhriat avang khan Mizoten kan chhiatpui leh tho mai.

    Sawrkar tan lu a hai duh ngawt ang. Kan khuahkhirh tawh a, kan thlah zalen leh a; mahse Zu in dun kan tlem tial tial chuang si lo a; lei tur a awm reng tho a. Kawng tha ber zawh tur pawh hriat a harsa tawh a ni.

    Mipui te pawhin ngaihdan kan sawi tam viau a, thlir dan hrang pawh kan ngah hle. Thenkhat in Politics zawngin an thlir a; thlenkhat in sawrkar sum lut an thlir a; thenkhat in Pathian atangin an thlir bawk a. Zoram mipuite hian thukhat kan vuan thei lo a ni.
    Tunah Zu chu khuahkhirh a lo ni leh ta a; mahse Zu a tlem chuang lo a; a man a to deuh tih mai a ni.
    Zu zawrh leh khap lama kan inhnialna hi bansan tawh ila; Zu in duh kan tlem theih nana tan kan lak emaw, kawng thar kan zawn emaw a ngai tawh zawk a ni. Sawrkar in khuahkhirh mahse mipui zingah Zu in duh kan tam chhung chuan tihngaihna a awm chuang lo ang.

    YMA (NGO leh a dangte) Zu tih tlem tumin an thawk chhuak a; hruaitu mi tlemte bak chet chhuah ve kan tum lem lo. An thil tih erawh kan dodal lo a; kan sawisel lem lo bawk a; kan thlir vel mai mai a ni deuh ber.

    Sawrkar nilovin mipuite hian Zu hi khuahkhirh ta zawk ila; Sawrkar chu min tanpui tur ang chauhin ngai ila; tun ai chuan kawngro a su thui zawk ngei ang. Zu titlemin chhungkaw tin atang hian pakhat tal zan tin thaawk chhuak thei phei ila chuan Zu vanga chhungkaw buai te; hriselna tlachhia te; ei leh bar zawnna tlahniam te hi kan pumpelh ang.

    Zu in min tihchhiat nasat dan te; Inchhung boruak nuam tur a tihchhiat dan te zirchiang ila; mipuiten khuahkhirh i tum teh ang u. Excise leh Police ai chuan kan thawhhlawk zawk ang a; awmzia pawh a nei zawk ang. Ral khat atanga lo thlirtu nih ringawt hian hlawhtlinna kan hmu hleithei dawn lo.

    No comments

    Post Top Ad

    Post Bottom Ad