• Breaking News

    Zirtirtu sem rual

    MZP hotupa chuan ‘Mizorama Zirtirtu indaihlohna hi Zirtirtu an tlem vangah kan ngai lo a; a awmsa te sem rual an nih loh vang zawk niin kan ngai’ tiin an Office hawnna-ah thu a sawi a. Chuvangin MZP chuan Zirtirtu semrual a ngai pawimawh a; Sawrkar a ngen zel dawn tih a sawi bawk.

    Kum 10 hma lamah khan Mizoram Zirtirtu semrual (rationalisation) hi sawrkar in hlawm lian deuh a lo kalpui tawh a; a bik takin khawpui atanga Zirtirtu sawn chuan an awm nual a. School zawng zawng rualkhai vek lo mahse tlem chuan a zia-awm deuh a nih kha. Mahse kha tih hun laia thil hrechiang inti deuh chuan khang Zirtirtu sem rual te kha kum khat a ral hma-in tam tak khawpui ah sawn luh leh an ni tia sawi an awm a; Zirtirtu sem rual thil awlsam tak a ni lo a ni mai thei.

    Education Minister thar in Zirna chungchanga hma lak a tum dan a sawi-ah pawh Zirna tha neih a tum hle a. Chumi atana Sawrkar tih theih ang ang tih chu a tum viau niin a lang. Mizorama Education System siam thatna tur kawng pakhat chu Zirtirtu sem rual a ni.

    Dist khawpui leh Sub Division chin hmun tam zawkah hi chuan Zirtirtu an indaih deuh mai thei. Mahse Thingtlang zawkah erawh chuan Zirtirtu an tlem hle thung. Chutih laiin Zirtirtu thawk mek zingah School kal tha lutuk lo; pawimawh danga chhuak reng an awm bawk a. Heng avang te hian Thingtlang lam zirna hi a hnufual hle a ni.

    MZP in Zirtirtu sem rual tura sawrkar a ngen thin hi thil tha leh pawimawh tak a ni. School Zirtirtu thenkhat hi chuan Khawpui chhuahsan an hreh hle. Ruling Party hruaitu zingah lam tang siamin Sawrkar thuneitu hnenah sawipui turin an ngen thin bawk.

    Hetiang boruak avang hian sem rual a lo ngai thin. Khawpui-a Sawrkar School thenkhat ah hi chuan an indaih hle pawh a ni mai thei e. Chuvangin Sawrkar hian Zirtirtu hi rualkhai takin dah kual se la; Political Party hruaitute pawhin Zirtirtu sem rual tumna kawngah hian Sawrkar hotulian te hnenah tumah sawipui lo se la; Education Deptt in tul leh pawimawh a tihna hmun apianga thawk mai turin Zirtirtu pawh inhuam se a duhawm hle a ni.

    Kan thawhna tur chu Thingtlang pawh nise; lawm takin pawm mai ila. Kan thawhna khua-ah pawh nghet takin khaw neitu chan changin thawk mai ila a sual lo hle. Khawi hmunah pawh thawk ila, Sawrkar in hlawh min pe a. Kan thawh hlawh kan lak theih chuan Thingtlang a thawh pawh i hreh lo ang u.

    No comments

    Post Top Ad

    Post Bottom Ad