• Breaking News

    Zirna tha

    India Sawrkar in zir dan kalphung thar a siam a; a tha hle. A siam that hma pawhin zir dan hmasa kha a chhe chuang lo. Officer leh mi thiam tam tak chher chhuah an ni tho a. Miropui an chhuak teuh tho a ni. Sawrkar chuan zir dan kalphung chu tha zawk nia a hriat ang in a la tidanglam zel mai thei. Kal phung kan la thlak fovin a rinawm.

    Zirna kalphung chu eng tiang pawhin thlak ila; ‘Zirna tha’ kan neih si loh chuan kal phung tha ringawt chuan kawng ro a su thui lo. Lehkhabu lei thar-a zir chuang si lo ang chauh kan ni. Kan mamwh ber zawk chu Zirna tha a ni. Uniform thar te; Bag thar te; Zirlaibu thar te chu Zirna hmanrua an ni mai a; Zirna tha erawh chu sum leh paia lei chhuah tum aiin thinlung atanga intan tur a ni zawk.

    Mi thenkhat chuan School te kan chhuanlam a, kan fate School kalna leh School dangte kan khaikhin a; School kalna insawn te kha tha zawk dawn ni ten kan hria a. Mihringin beiseina kan neih tlat chuan tu dan theih mah a ni lo ang. Mahse a pawimawh zawk chu Zirna leh zir dan kha a ni.

    Private English Medium School kan bawh viau a; Sawrkar School kan hnualsuat deuh a. English Medium Zirlaibu leh Sawrkar School Zirlaibu a inang deuh reng a. Mahse mipui hian Sawrkar School kan ngaizawng tlat lo. Hei hi kan rilru-a intuh nghet siam danglam har tak si chu a ni.

    Kan fate School lam ai chuan Zirna tha nei turin tanpui ila; thiam turin beihpui bawk ang u. An zirlai an thiam loh hian School lama anmahni zirtirtu va dem daih mai awl tak a ni. Zirtirtu chuan naupang zawng zawng zirtirna khairual takin a pe a; tu fate mah a bikin classroom ah a zirtir lo. Chumi hnu nu leh pa tih tur chu an zirlai lo thiam tir kha a ni thung.

    Zirna tha hi School tha in eng emaw chen chu a keng tel ang. Mahse khawtlang in duhthusam ang School tha kan neih si loh chuan In lamah Nu leh Pa ten kan fate kan lo beih ngawrhpui a ngai deuh dawn tihna a ni mai. Chu chuan Zirna tha zawk a hring chhuak ang a. School-a innghat pumhlum ringawt lo thiamna a neih phah dawn tihna a ni.

    Vawiina kan thlir dan hi i thlak teh ang u. Nu leh Pa ten In lamah Zirna tak tak kan lo beihpui si lo a; Homework an tih zawh chuan kan duh tawk sak mai a. Thiamna an nei em? Hriatthiamna an dawng phak em? Taimakna nen an inthuam em? tih thlengin kan fate vil zui ila; Zirna tha chu keimahnin kan paw chhuak thei mai ang.

    No comments

    Post Top Ad

    Post Bottom Ad