• Breaking News

    Whatsapp thu post

    Thiamna sang leh hmanrua changkang vang te; mithiam ten Satellite tha leh chak an kah chhuah vang te hian kan khawvel thlir dan pawh a lo danglam ta hle a. Khawvel ral leh lama thil thleng pawh reilote chhungin kan hre zung zung a; kan chhiar peih phawt chuan kan Mobile phone kaltlangin chhiar sen loh kan hmu a; thlalak thlengin kan nei zung zung tawh a ni.

    Kum tam pawh a la ral lo, Internet khawvel kan chuangkai ta a; tunah chuan mi zawng zawng hian Internet kan nei vek tawh a ni. Kan duh zawng sawi ve theihna tur Application tha tak tak an siam a. Mizo zingah Twitter hmang kan la tam lo; Facebook leh Whatsapp erawh kan hmang nasa hle a ni.

    Heng thil te hi media a ni a; kaihhruaina dan leh dun awm vek a ni. Mahse mi thenkhat hi chuan Media anih dan lam kan ngaihtuah vak lo a; Dan hnuaia hman tur anih lam pawh kan hre hek lo.

    Whatsapp ah ngat phei chuan mitin hian kan rilru-a awm leh vei zawng kan sawi ve thei ta a. Chutih rualin kan fimkhur thiam lo thung. Social Media te hi Dan in a khuahkhirh tih lam kan ngai pawimawh vak lo a; kan rilru-ah Dan a awm tih pawh kan hre mang lo. Thenkhat chuan India Constitution-a Rights kan neih zingah Right to Freedom kan chang chawi a; Zalenna zawng zawng kan nei ta emaw kan inti a. Kan hre sual hle tihna a ni.

    Whatsapp lama kan thu post te hian pawi a sawi thei. Mi rilru a tihliam a; thu dik ni si lo-ah midang Rights kan va tihbuai chuan Dan kan bawhchhia a ni. Zalenna kan neih ang chiah khan midang pawhin Zalenna an lo nei ve a; Rights kan changchawi ang bawk kha midang pawhin Rights hmangin min khenglet ve thei a ni.

    Tun hnaiah phei chuan Social Media lamah hian tu te emaw chanchin leh thil tih dan kan sawi a; a tuartu rilru na tak kan siam ta fo mai. Hetianga kan tih chuan India Danpui kan kalh tihna a ni. Kan zalenna neih chuan midang zalenna huang a va dai tur a ni bik lo.

    A chang phei chuan tawngkam kan duh tui lo hle. Pawi a sawi lek lek a ni. Social Media a lo chhuah hma kha chuan Media chu Journalist te kut-ah a awm deuh ber a. Journalist te chuan Media kalhmang an zir a; sawrkar pawhin zirtirna a pe thin. Zawm leh tih loh tur te; thuziak dan tur kalhmang thlengin Media chuan kaihhruaina a nei a ni.

    Mahse tunah chuan mi zawng zawng kutah Media chu a lo awm ta a; mu chung pawhin thu kan chhuah thei a; kan rilru erawh a fimkhur tawk lo hle. Whatsapp leh facebook lama kan thu Post tur reng reng hi uluk ila; kan chungah Hremna Dan a rawn let hei tih i hria ang. Kan duh zawng apiang kan sawi thei a; mahse kan thu sawi chuan midang zalenna (Rights) a va su buai tur a ni lo.

    No comments

    Post Top Ad

    Post Bottom Ad