• Breaking News

    Tuitun duty

    Editorial
    Khawtlang hruaitu kalkhawm ten nitin inchhawkin Tuitun ah duty in dah nise tiin an rel a. Duty-te tih tur pawh an sawi nghal bawk. Duty te chuan Lui kam vela lirthei chawlh phal loh te; insuk leh inbual phal loh te; Tur hmanga Lui hrai an awm leh awm loh enfiah te; Tuitun leh Chhimluang lui hnar lam tlawh fo te an tih tur a ni a. Hna hah thlak tak ni lo mahse inthlahdah mai theih chu a ni chuang lo.

    Zing chaw ei kham ah duty an chhuak a; thenkhat chu chhun lai velah an lo let leh mai a. Kawngpui kama lirthei chawl leh inbual duh tan duty loh kar a tam duh hle ang.

    YMA Branch chuan tlawmngai takin member te a thawhchhuahpui a; thu mai mai lovin duty tih tur dik tak an ti a ni. Tunah hian VC te duty hun a lo thleng ve ta a. VC member tlemte tan chuan indaih a har dawn avangin VC te chuan duty tur midang an ruat a ni. An ruat dan chu eng ang dinhmun pawh nise, hlawhfa anga thawk tur emaw MGNREGS inhlawhna anga chhiar tur emaw pawh nise duty hming an pu a; thahnemngai taka an thawh a pawimawh.

    Mipui ten kan aiawha Tuitun venghim turin kan tir a; anni pawhin mipui ai an awh a ni tih inhria sela; zelthel miah lovn duty se a duhawm. Dik tak chuan va tih tur a awm lo viau mai a; dik tur a awm loh vang tak chuan ninawm a ni thei hial mai thei. Mahse eng hun ah nge kan thil ven ber hi a lo thlen dawn tih a hriat si loh avangin inthlahdah chi a ni hauh lo.

    Tuitun veng tur hian kan la duty zel dawn a; mi hrang hrang kan la chhuak ang. Kan thil ven tur ber hmu phak lova hmun danga lo awm daih te pawh chakawm chang a awm ngeiin a rinawm. Chu bakah Lui-ah zuk chhuk a; Chakai leh Ulawng zuk man te pawh chakawm chang a awm thei ang. Mahse chung thil te chu midang pawh ti lo tura kan ven tur anih avangin keini chuan tumna pawh neih loh a tha.

    Mipui aiawh venghimtu kan nih in hre reng ila; taima taka duty tur anih pawh hre bawk ila. Tlai lamah haw tlai deuh pawh ngai se, inhuam zel tur kan ni. Chutiang taka kan lak thu tak loh chuan tha leh tui, sum leh pai kan seng thlawn ngei ang.

    No comments

    Post Top Ad

    Post Bottom Ad