• Breaking News

    TUARNA NGAINEP SUH, NUNNA A NI

    Kan hriat angin, Lal Isua pian champha kan lawm a, kan hlim tlang hle in a lang. A lawm awm e. Amaherawhchu tihho hlimnaah hian duh tawk mai lovin, a rawn pian leh a rawn kal chhan lam hi kan ngaihtuah zui a pawimawh ber zawk chu niin, chu lam chu i hawi dawn teh zawk ang.

    Lal Isua rawn kal chhan tak hi kan ngaih mai ang ngawt hi chu a ni lo deuh chuan a lang. Isuan Kraws ah min tlan nan a nun a pe a, chumi ringtu apiang chu Chhandam in an awm ang, tih mai chu awl tak a ni. A rawn kal chhan tleitlakna nat zia hmutu Kapliana chuan hlain a rawn siam chhuak a, chumi hla denchhen chuan tawite han sawi ka tum a ni. Chumi hla chu han tarlang hmasa ila.


    1. Ka thla thlawkla, Thuro angin,

    I tlanchhuahna ram va fang teh;
    Khawpui daiah i tlantu sualnain a sawr a,
    A in tur No kha chuan thisen thlanah a fartir;
    Hmangaih thungna puan nemin a thlansa chu va hru rawh,
    Tun thlengin hmangaihna lal chu a hmangaihna haider tuten;
    An rum nawntir fo thin a ni,
    I rum thawm lo thang nawn leh se,
    An tan I thlaphanna hnam tinin an hriat theih nan.
    Ka fa ka tuarna ngai nep suh,
    Ngainep lul suh a na em e;
    Ka thisen far tin reng hi tihdamna hriak a ni,
    Chatuan lawmna Van In khi ka thisenin ka hawng;
    Thlarau vakvai lut mai rawh tiin Lalpa’n,
    A sawi thin.


    He hla siamtu hian, Lal Isua tuarna nat zia a hmu chiang hle in a lang. Khawpui daiah i tlantu sualnain a sawr han tih lai tak mai hian, Getsemani huana Isua lungngaih zia a tilang chiang hle maia, A in tur No kha a tih tak mai hian a tilang chiang zual hle a ni. Isua’n Getsemani huana a \awng\ai laia a thlan thisen lian tak anga rawn far te kha thinlung takin hrechiang chiah ila chuan, tuna kan hlimna ang mai mai hi chuan kan hlim lo mai thei. “Aw ka pa, a theih chuan, he No hian mi pel lul rawh se, nimahsela keia thu ni lovin, nangma thu ni rawh se”. Kha lai tak mai kha hmuin han hrechiang chiah ila chuan mittui a far lo theiin ka ring lo.


    2. Enteh khawpui ehhung mipui saw,

    Eng vangin nge an pun khawm hlawm;
    Chhantu neilo Beram No hmelmaten an hual a,
    Tihelna Lalpuan leh tiang kraun hling an phiar khumin;
    Kalvari a pan mek e, khawnge i lal lukhum leh,
    Van thuneihna Lalthutthleng kha;
    Tunah hling phiar kraun i khum tak,
    Ka ropuina ka Van In khi, ka ngai nangmah ngaihna a zual;
    Min fak thin a, Angel hote i sualnain a khar.


    He lai chang hian Kalvari tlang pana Lal Isua, Kraws pu chung mai ni lo, hling tianga vuak na tuar chunga Khawvel sual phura Kalvari tlang a panna kawng rapthlak zia, Pain khawvel a hmangaih em avanga Van rorelna in leia mihring te, Pathian nena inzawm tawh lote Vanmi an nih leh theih nana Lei mihringte tlanchhuak leh tura an thuthlukna hlen chhuak tura khawvel a lokala chu van thuthlukna phur chhuak tura a lokal zia a tilang hle a ni.


    3. Sual bukna kraws a nghah hnuah,

    A chungah thirin an chawlhtir;
    A lu nghahna hmuh chhun thing anchhe dawng chung a ni,
    Ni thimin lirnghing se, Lungpui te khi chat rawh se;
    Sual kalpuina tha zam chu a chat ta a lu a kuna,
    Thlir teh Pa leh Vanho thinlung;
    Hnehna lawmin tuarna an sun,
    Kei pawh ka thlirin ka biang ah;
    Lawmin hmangaih mittui a luang,
    Tunah i retheihna min han thlirtir leh ang.



    He chang hian, khawvel sual phurh hautak zia leh chu tuarna tlei tlaka hnehna ropui chu sunna leh hnehna lawmna thawm nen chatuan atana Setana hneha awm ta chu ropui takin sunna nen an lawm zia a tilang chiang hle a ni. Keini pawhin chu tuarna rapthlak chu tuarpui chungin chatuan hnehna chu kan lawm thei dawn lawm ni?


    He Bible chang hi chhiar ngei turin ka ngen che a ni e. Isaia 55:2,3; Joh. 5:24; Heb. 10:29-31.

    No comments

    Post Top Ad

    Post Bottom Ad