• Breaking News

    Tualchhung Chanchinthar Lawrkhawm


    Vairengte-ah Zu phurhluh sawiho

    Mizoram Zu khuahkhirh anih tak avangin State pawn atanga Zu leh Ruihhlo dang lo lut thin danna kawng sawiho-in Inrinni khan Vairengte-ah Joint Committee neih a ni a. He hun hi Central YMA Vice President Pu R Lalngheta leh Sub Hqrs YMA Kolasib ten an hmanpui a. Excise leh Police bakah Sawrkar Deptt thenkhat te; Vairengte Joint YMA hnuaia Branch hrang hrang te an tel a ni.

    Central YMA Vice President chuan State pawn atanga Zu leh Ruihhlo lo lut thin tih tlemna kawngah Vairengte chu hmun pawimawh tak a ni a; helai hmunah hian Sawrkar Deptt leh NGO ten theih tawp an chhuah chuan thui takin kawngro a su a ni a ti a. Chuvangin theihtawp chhuah turin a sawm nghal bawk.
    He huna kalkhawm te chuan chak zawka hma lak dan tur an sawiho nghal a; Excise leh Police te tanpui leh mipui tan rual a pawimawh thu an sawi a ni.



    1st IR Bn pakhatna

    Mizoram Police Dy IGP in Category hrang hranga Mizoram Police tehna a tihchhuah zingah 1st IR Bn Mualvum chu Armed Police Bn zingah a tha ber, pakhatna an ni a. Pahnihna chu 2nd IR Bn niin pathumna chu 1st Bn MAP an ni. Police Unit tehna Category - I ah chuan Security Unit chu a tha ber an ni a; Traffic Unit chu pahnihna niin MPRO Unit chu pathumna an ni thung. 1st IR Bn Commandant Pu J Lalthafamkima chuan Unit Category II a titha ber an nih theihna chhan chu Bn Officers te leh sipai te vang a ni tih Chhuahtlang a hrilh.
    Mizoram chhunga Police Station tha ber atana thlan chu Thenzawl Police Station a ni a. Vairengte Police Station chu pahnihna an ni a. Aizawl Police Station chu pathumna an ni bawk.
    District ang zawnga tehna ah chuan Lunglei Dist chhunga Police te an tha rual ber a; Kolasib District chu pahnihna an ni a; Champhai District chu pathumna an ni.
    Tehna hrang hranga titha 3 te hian Mizoram Police Rising Day karleh Thawhtanni ah khian Thenzawl Police Trainingna hmunah lawmman an dawng ang.



    Tialte lui humhalh tum

    Inrinni khan Tialte Zau Association chuan Khankawn Farmers Chawlhbuk ah Assembly an hmang a; he hunah hian Farmers te chuan Luisa leh Sava te humhalh chhunzawm zel nise an ti a. Kangmei laka Zau a fihlim theih nan mi zawng zawng \anrual pui atan an sawm a; theih ang anga hma lak nise an ti bawk. He Assembly hi Pu Lalramhrila Association Chairman in a kaihruai a; Pu Vanlalruata RO Forest chuan Ram tikangtu leh Luisa leh Sava tihlumtu hrem theihna dan te a sawi a. Tialte Zau hmalak mek fakawm a ti hle. Pu Lalnunmawia Aizawl Police Station-a Sub Inspector pawhin he hun hi rawn hmangin Dan hmanga ram tikangtu hrem theih dan a hrilhfiah bawk. Zau hruaitute chuan Tialte chu Chinai leh Tur hmanga an hrai nasat avangin Luisa hmuh tur pawh a awm tawh mang lo a ni an ti.



    Inpeih thawkhat

    Mizoram Thalai Kristian Pawl Inkhawmpui lian thlenna tura Licheng Field, Tlabunga Pandal sak chu zawh fel thawkhat a ni ta a, inbuatsaihna hrang hrang pawh an inpeih fel thawkhat ta e. February 14-17, 2019 chhunga neih tur Tlabung Pastor Bial TKP-in a thlen turah hian nikum November thla atanga khan Pandal sak hna an \an tawh a, Pandal hi Pu Buanga leh Sap Upa Rûn tiin vuah a ni a, tunah hian a chhung chei, Sound & Light dah pawh zawh thuai beisei a ni.



    Red Oil Palm leina Nuai 531.65

    Agriculture Deptt, DAO Kolasib hnuaiah Red Oil Palm thar chhuah leisak nan sawrkar in cheng Nuai 531.65 a seng tawh a. Dist chhungah hian ram 6908.4 ha zeta zauah Red Oil hi chin mek niin Deptt chuan a sawi.

    Zirtawpni khan Agriculture Director Pu J Lalzamliana chuan Dist chhunga Red Oil chingtu mi 31 thlan chhuah te hnenah Red Oil rah lawhna nana remchang tur Aluminium Leihlawn pakhat Rs 9600/- man theuh a sem chhuak a. Deptt in a chhinchhiah danin kum 2005 atang khan Dist chhungah Red Oil chin tan a ni tawh a; tun thleng hian Tiak 1168917 pek chhuah a ni tawh a; 9904.98 Metric Ton thar chhuah a ni tawh an ti.



    Lirthei 73 man

    Mizoram Excise & Narcotics department chuan kum 2018 chhung khan ruihhlo phur lirthei 73 an man a; ruihhlo phur lirthei an man te hi two wheeler 28, three wheeler 4, LMV 39 leh HMV 2 te an ni.

    Excise & Narcotics department hian nikum chhung khan rakzu litre 34607 manin heroin kg.8.723, ganja kg. 187 an man bawk a. ND&PS Act hnuaiah case 519 ziak lutin mihring 662 an man a, MLPC Act hnuaiah case 1813 ziaklutin mihring 1482 an man bakah Mizoram Excise Act hnuaiah thubuai 141 siamin mihring 154 an man a. Drugs and Liquor law hnuaiah ramdang mi 29 an man bawk a ni.



    Mega Rally-ah tel

    Election Commission of India in kum 2019 Lok Sabha inthlanpui a puan hmaa rally ‘Mega Rally’ chu Inrinni kalta khan Brigade Parade ground, Kolkata, West Bengal-ah Mamata Banerjee kaihhruai, Trinamool Congress (TMC) çhuan a huaihawt a. He Rally-ah hian India rama political leader engmaw zat telin Mizoram atangin ZPM Leader, Pu Lalduhoma, MLA leh Pu Andrew H. Thangliana, Tuirial bialtu MLA te pawh an tel a, Pu Lalduhoma hian thu a sawi nghe nghe a ni.
    He Mega Rally ah hian mihring nuai 40 vel zet an kal khawm a, Mizoram atanga he Rally-a tel ZPM MLA pahnih, Pu Lalduhoma leh Pu Andrew H. Thangliana te hi vawiin hian Aizawl an rawn thlen hman beisei a ni.



    Nikum-ah Ruahtui mm 1749 tla

    Science & Technology Department chhinchhiah danin nikum 2018 chhung khan Mizoram-ah ruahtui mm 1749 a tla a; June thla ah ruaitui hi tla tam berin 463 mm a tla a, December 2018 ruaitui tla a awmlo thung.
    Ni khat thil thua ruahtui tlak tam ber ni chu June ni 12, 2018 (Thawhlehni) kha a ni a, hemi ni hian 148 mm a tla nia chhinchhiah a ni. Khawlum ni ber chu April ni 18,2018 (Nilaini) a ni a, hemi nia khawlum lam chu 34 celsius degree a ni. Khawvawh ber ni chu January 8, 2018 (Thawhtanni) niin hemi nia khawvawh lam chu 4.4 degree celcius a ni.



    Education in Statistics tichhuak

    School Education department-in a tar lan danin, Mizoram pumah Higher Secondary School 175 a awm a, zirlai 21,863 leh zirtirtu 1,714 an awm a. School hi 119 zet hi Sawrkar atanga tanpuina dawng miah lo, khawtlang mipui enkawl a ni a. Mizoram sorkar enkawl 20 a awm a, sorkar laipui enkawl panga leh Mizoram sorkarin hlawh a tumsak, deficit 7 leh adhoc aided 13 a awm. Sorkar atanga tanpuina hmu thin (one time grand) HSS 11 a awm bawk.


    High School zawng zawng hi 669 a ni a; zirlai 37407 an ni a; zirtirtu 4274 an ni. Zirtirtu pakhatin zirlai pakua zel an enkawl a ni.

    Mizorama Middle School 1580-ah zirlai 88711 an awm mek a; 9218 an ni a. M/S-ah hian chawhrualin zirtirtu pakhatin zirlai sawm zel zirtir ang an ni bawk.
    Primary School 1969 a awm a, chutah chuan zirlai 145189 an awm a; zirtirtu 8459 an awm. P/S-ah hian zirtirtu pakhatin zirlai 17 enkawl ang an ni.


    AIDS  vanga  thi  2148

    MSACS chhinchhiah danin Mizoram puma HIV/AIDS vei hmuhchhuah tawh zingah 2148 an thi tawh a; 16129 an la dam mek bawk. He thu hi nimina Aizawl Municipal Council chhunga Local Council Meeting-ah Dr. Lalmal-sawmi Sailo, PD MSACS chuan a sawi a; a sawi zel danin Mizoram pumah Mipa inzuar 500 a\anga 1000 inkar an awm mek a, ‘kan gender a ni’ tiin an zak lo a ti bawk. HIV/AIDS kai zinga za zela 48(%) chu pawmlai nei (Nupui/pasal nei) tawh an ni.

    No comments

    Post Top Ad

    Post Bottom Ad