• Breaking News

    Thingzai ni lo thil dang

    Hman atangin hmanrua atana kan hman ber chu Thing leh Thingzai a ni a. Vawiin thleng hian kan la mamawh a. In sak kan tum a; Concrete sak tum pawhin Thingzai tam tawk kan ngaihtuah a ngai ta zel a. A thlakna tur thil dang hi kan rilru-ah a awm ta vak lo a ni.

    Mizo te ang bawk hian State danga Vai te; ram danga Sapho te pawhin In lian tak tak an sa a; mahse Mizo angin Thingzai tam tak an hmang ve lo a; Thing aiah hmanraw dang an hmang thung a. A remchang zawkin a awlsam zawk a ni. Tunlai ah phei chuan Tukverh leh Kawngkhar ah pawh Thingzai hmang lo kan awm ta zeuh zeuh a. A tlo zawkin a mawi zawk bawk.

    Mizote hian In sak nana Thingzai kan la hmang nasa lutuk hi State danga mite tih ang deuhin a thlakna ngaihtuah ve kan ngai tan tawh a ni. Thing chauh a ni lo. Mau leh Dap tam tak kan mamawh bawk a. A do na tur Mau aia tha zawk leh tlo zawk ngaihtuah thei ila; Slab chhun nan pawh Dap aia tha leh hnu hma mawi zawk ngaihtuah thei bawk ta ila chuan Ram ngaw humhalhna tur kawng tha tak a ni ngei ang.

    Hnam dang te chuan Ban leh Beam chhun nan Thingzai an hmang tawh mang lo a; Plastic khawng taka siam an hman loh pawhin Industry in Slab Board tura a siam sa an hmang tawh a. A hnuhma pawh a mam zawk a; chetpui a awlsam zawk bawk. Chutiang bawkin Slab chhun nan pawh Thingzai leh Mau an hmang tlem hle. A do nghehna turin Iron Frame an hmang a; Slab hnuaia phah tur pawhin Slab Board an hmang a; a mawi zawk bawk.

    Mahse Mizo zinga harsatna awm chu hetiang Iron Frame leh Slab Board te hi State pawn atanga lei ngai anih avangin tun mai atana hman nghal chu a buaithlak a ni. Khawpui ah chuan man chawia hawh mai tur a awm a; hman zawh-ah an pe let leh mai a. Thingzai phek, Thingzai, Mau leh Dap kan lei teuh ai hian man chawia hawhin senso a tlem zawk a; hman nawn zel theih anih avangin dah that mai tur a ni a. Zawngchhang chi tak a ni zawk.

    Mahse In lian pui emaw, chhawng sang tak emaw kan sak ngai loh avangin mimal anga mamawh zawng zawng lei vek a harsa a; chuvangin man chawi hawh theih angin awm thei sela Ram ngaw humhalhna tha tak a ni ang.

    Kumin ah hian Thingzai leh Mau thlakna tur kan nei nghal mai thei lo anih pawhin kan rilru-ah hian awm sela; Thingzai a to tial tial a; a vang tial tial bawk a; eng hunah emaw chuan kan la duh dawn tho tho a ni.

    No comments

    Post Top Ad

    Post Bottom Ad