• Breaking News

    Tapchhak zawl inhrosak

    Hmanlai Mizo chanchin thenkhat kan chhiar ah chuan Chhungkhat pa chu tapchhak-ah thu reng mahse Chawhmeh leh thil chhuan mek ah buaipui ngai a awm chuan Nu ber a ko a; a tir thin. Pa chuan khawih pui tumna a nei lo. Chu chu intihpa-na chi khat angin an ngai a. Pa ber chuan chhungkaw hotu anihna a lantirna pakhat angin an ngai a nih hmel.

    Tapchhak-a Pa ber thu reng chunga engmah tih duh loh te; midang tih tur hmuh theih leh midang tirh ang chi sawi nan hian ‘Tapchhak zawl’ thukhawchang hi kan hmang ta zeuh zeuh niin a lang. Thu ngaihnawm ang reng tak, mahse thu taka lak tur awm vak si lo te pawh ‘Tapchhak zawl ti ti’ tiin kan sawi ta zel a. Kan man thiam hle. Chutiang bawk chuan thil tha tih tur leh tih dan tur hre phian si; thlir dan fing leh dik awm taka ngaihtheih, mahni chet chhuah tumna awm si lo rilru te pawh ‘Tapchhak zawl....’ nen kan tehkhin ta a.

    A tak tak engmah ti ngam chiah si lo. Huaisen ber ni awm taka inhrosa thin te pawh ‘tapchhak zawl inhrosa’ angin kan sawi ta a. Chutiang mi chu kan awm nual a ni.

    Miin thil tha leh dik tih an tum a; mahse an kalkawng chu awlsam taka hlen theih anih loh hian Tapchhak zawl atanga lo thlir sak mai hi awl tak a ni. Khawtlang mipui chet a ngaih huna che chhuak ve ngam nih te hi a hlu a; Mizo kan nihna anga kan Hnam him nana chet chhuah a tul huna che chhuak ngam nih pawh a ropui bawk.

    Chet chhuah harsat hle si, che chhuak tura inpeih te rilru tihnual thei zawnga ngaihdan lo vawrh te hi kan ching ta phian zel. Naktuk maiah pawh hian Citizenship Amendment Bill duhlohna kawngzawh chu Mizoram hmun tinah neih tum a ni a; heng hunah te tak hian Tapchhak zawl inhrosak ai chuan a hmunah ngei kal ve a dik a ni.

    Kan che chhuak ve ngam lo anih chuan thuthmun atangin thlir dan mak deuh deuh lo neih sak lo ila. He Bill hi Mizote tan a him dawn lo tih kan hria a; a him lo anih chuan a dodalna lama ke kan pen hi a duhawm hle.

    Hei chauh hi a la ni lo ang. Kan khawtlang, kan Hnam, kan ram leh Mizote tana thil tha tih tur hma chhawp kan neih hun apiangah Tapchhak zawl kalsanin tho chhuak ila; ke i pen ve zawk ang u. Awm hmuna lo awm te aiin a hmuna kal te hian ngaihsan leh chawimawi an hlawh thin a ni.

    No comments

    Post Top Ad

    Post Bottom Ad