• Breaking News

    Sensitization Workshop " Fai turin kan thawk zel dawn'

    Kawnpui
    Feb 22, 2019 khan Awithangpa Hall-ah SDO (C) Pi Lalhruaitluangi MCS hovin Swachh Bharat Mission (Urban) hnuaia Faina kawnga hmalakna Sensitization Workshop neih a ni a, he hunah hian Faina kawnga Slogan inphuahsiak lawmman sem nghal a ni a, Pu Lalthlanzuala, Kawnpui Chhimveng chuan a slogan phuah ‘Fai turin kan thawk zel dawn’ tih chu lawmman pakhatna a lakpui a ni.

    He hunah hian Pi Lalhruaitluangi chuan Faina kawnga hmalak dan tur leh a pawimawhna kawng hrang hrang a sawi a, kum tam tak Faina Hapta kan lo hmang tawh a, Hapta chhung chuan theih tawp chhuahin Faina kawngah hma kan la a, sum leh pai, tha leh zung tam tak kan seng a, mahse Hapta a zawh veleh kan bal/fai lo leh nghal zel a, Faina Hapta hian rei a daih ngai lo. Mi tam tak hian kan Compound leh kan In chu kan tifai viau a, mahni Compound vawng faitute pawh hian vantlang hmuna bawlhhlawh (Kuhva eina bang, Ciggarette bung) paih chu kan hreh leh chuang lo. Public Place (Vantlang hmun)ah chuan Bawlh-hlawh kan paih hreh leh chuang lo. Hei vang hian Faina kawngah hian zir tur tam tak kan la nei a, theih tawp chuahin hma pawh kan la mek zel a ni a ti a.

    SDO (C) chuan sawi chhunzawmin Mipuite te hian NREGS hnathawhnaah chauh Faina Hnatlang neih hi kan chanvo a ni tiha kan hriat chhung chuan Faina kawngah hmabak kan la ngah hle tih a hriat a, Faina kawngah hian mimal tin, chhungkaw tin hian tih tur kan neih tih hriat a pawimawh a ni a ti.

    Veng tina Sanitation Committee chungchang pawh sawiin, Sanitation Committee te chuan kan tih tur chu Faina kawnga hmalak mai a ni a, a bak tih tur vak a awm lo. Faina kawnga hmalakna kawngah chuan Sawrkar atanga tanpuina phut nghal mai lovin kan tih theih tawkah hma la hmasa phawt ila, a bak kan tih theih bakah chuan Sawrkar pawh a inhuam em em a ni a ti bawk a ni.

    Pi Lalhruaitluangi chuan Faina kawnga ke kan pen tawh chuan tha thlah a rem tawh lova. Thu awih, chet chhuah leh luangrual taka thawhho a pawimawh a ni. Veng hrang hrangte thil tam takah in lungrual thei lo mah ila, Faina kawngah chuan kan inlungrual a pawimawh a ni a ti bawk a, SDO (C) hian Faina kawnga hmalaknaah hian kan tihbalh pawh kan thenfai thei loh laia khawtlang mawina (Beautification) lam chu kan la hlat hle a, a bultir atanga hma lain Faina kawngah ke kan pen chho mek a ni a, hma kan sawn chho zel a nih chuan Beautification lam tan kan lak hun pawh a la awm ang a ti bawk a ni.

    Sensitization Worshop-ah hian Faina kawnga hmalakna peng pakhat atana ruahman Slogan inphuahsiak result puan nghal a ni a, Pu Lalthanzuala, Kawnpui Chhimveng chuan lawmman pakhatna Rs. 1000/- a dawng a, C. Lalsiamthari, Kawnpui Vengthar chuan lawmman pahnihna Rs. 700/- dawngin Lalduhawmi, Hmarveng chuan lawmman pathumna Rs. 500/- a dawng bawk a ni.

    Sensitization Workshop-ah hian VCs, NGOs leh Sanitation Committee atangin mi 81 an kalkhawm a ni.

    No comments

    Post Top Ad

    Post Bottom Ad