• Breaking News

    School tan hun zing dar 9:00, etc.

    Mizoram 2019
    Nimina Council of Minister thukhawm chuan Session thar atangin Mizoram Zirna School te chu zing dar 9:00 ah tan ni tawh se an ti a. Hetih lai hian Private School zingah zing dar 9:00 a tan theilo an awm chuan School Education Director hnenah hriattir zel nise an ti.

    Council of Ministers chuan Sawrkar laipui-ah Citizenship Amendment Bill pass tura rawtna kal mek chu pawm tha an tiloh thu leh an duhloh thu sawiin theihtawpa dodal zui zel nise an ti bawk.

    Nimina Council of  Ministers thukhawm chuan Minimum Wages rate a siam tha a; Muster Roll-a thawkte nitin hlawhbi rate tur chu Unskilled tan Rs 380/- (thla khatah Rs 11400.00); Semi Skilled tan Rs 420/- (thla khatah Rs 12600.00); Skilled II tan Rs 520/- (thla khatah Rs 15600.00) leh Skilled I tan Rs 640/- (thla khatah Rs 19200.00) a ni tawh ang.


    Hriatthiamna  ngen

    Kolasib Treasury Dept. a\anga thu dawn danin Seventh Pay Pension revision chu Treasury staff te chuan a hma thei anga tihchhuah tumin theihtawp an chhuah a. Pension khawihtu hi mi pahnih chauh an ni a, chutih laiin pakhat zawk dam lohna vangin phai lamah a inenkawl mek a, hei veng hian duh angin an thawk chak thei lova, pensioner te hriatthiam-na an ngen a ni.

    February thla hi chuan inpeih hman an tum a, chuvangin hna tluang taka an thawh theih nan Pension revise chungchangah chuan a thawktute tibuai lo hram turin an ngen bawk a ni.

    Hei bakah hian Pension bu thehluh chung-changah a hlawmin a list fel tak nen thehluh theih a ni a. Treasury chuan 1.1.2016 hma lam pension an revise anga, 1.1.2016 chin leh a hnu lam pension te chu A&T lamin an revise dawn vangin 1.1.16 chin hnu lam tan chuan pension bu thehluh a ngai ve lo.


    Valentines Night

    MZI Hqrs Kolasib huai-hawtin Feb Ni 14, Zan dar 7-10 inkar hian District Sports Office kawt, Khuangpuilam-ah Valentines Night programme hman ani dawn a, he hunah hian zaithiam tak tak ten zaiin kalkhawm te an awi ang.

    He hunah hian a duh tan a hmunah ei tur tuihnai tak lei tur leh ei tur a awm dawn a, Seat arrangement pawh felfai taka kalpui a ni ang.


    Fire  Prevention  Week

    Nimin khan Kolasib ah Pu Vanlalchuailova Conservator of Forest chuan Kangmei ven Hapta (Fire Prevention Wekk) a hawng. Kumin hian Mizoram ah 'Ram tikang lo turin mitin i fimkhur ang u'  tih chu thupui atan hman a ni ang.

    Conservator of Forest chuan ram kangin chhiatna a thlen dan te; tui a tih tlem dan te; ven nasat a pawimawh dan te a sawi a. Pathian kan chenna tur ram min pek hi duat taka enkawl a tul thu a sawi.

    Fire Prevention Week hawnna hi Pu C Liankunga Sub Hqrs YMA President chuan a kaihruai a; NGO hrang hrang an tel a ni.


    DC  thar
    Mizoram Sawrkar chuan Kolasib DC atan Pu Zoengsanga MCS chu nimin khan a ruat thar a. DP & AR in nimina Notification a tih chhuah ah chuan Kolasib DC thar ruat hi Election Commission of India atanga thu an hmuh bawhzuina niin an ziak. Pu Zoengsanga hi Thingdawl-ah BDO in a lo awm tawh a ni.

    Vawksa  rate  thar
    Bualpui VC House-ah Thawhtan zan khan Kawnpui Joint VC Sitting neih a ni a, Vawksa rate leh Kawnpui College Committee te siamthat a ni. Vawksa rate chu hman nghal turin Kg 1 - Rs. 300/- ah tihsan a ni a, a mi sa Rs. 200/- a ni tawh bawk ang. College Committee chu remchangah tarlan a ni ang.

    Duty Record  thlirho
    Tuitun humhim tura nitin duty-a kal ten Tuitun PHE Pump House-a Record Book an dah chu nimin khan Committee hruaituten an thlirho a; nitina an thil tih te ziaka vawn that chu lawmawm an ti hle.

    Banner tar
    Vawiin hian Kawnpui Forest Range Office-a thawktute chuan Kawnpui leh a chhehvel khuaah Kangmei venna lam hawi Banner an tar. Pu Vanlalruata, RO chuan DFO atangin Banner hi 20 a la a, Kawnpui Circle khaw dangah 10 thawn chhuakin, a bak 10 awmte chu Kawnpui leh a chhehvel - Mualvum leh Bualpui thlengin vawiin hian an tar a ni.
     
    Thawhlawm  thawh
    Roman Catholic Father Matthew Arrackle chuan nimin khan Save Tuitun Committee hmalakna atan Rs 2000/- a thawh a. Committee an lawm hle. Pu Jigme Malsawmzuala Principal Higher Secondary School pawhin Thawhlawm a lo thawh tawh a ni. Committee hruaitute chuan Tuitun thianghlimna tura hmalakna ah hian thawhlawm thawh zel turin an beisei a ni.

    No comments

    Post Top Ad

    Post Bottom Ad