• Breaking News

    Plastic tam lutuk

    Bawlhhlawh bawm han en ila; Plastic leh Sahar lam chi a tam hle. Bazar atanga kan hawn polythene te; Kuhva funna Sahar te; Chawhmeh pack-na sahar te; naupang thil ei tur tuamna Sahar te hi a tam ber an ni. India rama Park pakhat ah chuan ‘Polythene leh Sahar lam chi reng reng ken luh an khap a; chuta thuziak pakhat an tar ah chuan Sahar lam chi tawih ral tur chuan kum 300 chuang a ngai’ tih a ni a. Chuvangin chu Park chu Sahar-a tihbawlhhlawh an remti lo a ni.

    Kan Lui dung te hi han en ila; Plastic awm miah lohna kawr ruam hmuh tur pawh a awm mang lo. Khaw chhung atanga luang chhuak Lui-ah phei chuan Plastic lam chi a tam em em mai a; tenawm khawpin a inhnawh khawm a. Tihfai tum pawh ni ila; tih ngaihna a awm tawh lo ang.

    Sikkim ramah chuan an Chief Minister in ‘kan khawpui thli luang khawm hi sum hmuh nan kan siam dawn’ tiin a sawi a. Hma a lak tirh lai kha chuan tuman an awih sak lo. Mahse tunah chuan khawpui atanga luang chhuak Lui chu khualzin (tourist) hovin an tlawh nasa a; sum tam tak hmuh nan an hmang ta reng mai. A chhan chu - kha lui-ah khan thil thar pawh a siam chuang lo. Mahse khawpui thli thianghlim taka a awm thei kha Tourist ten mak an ti a; an tlawh ta mai a ni.

    Kan thianghlim ve thei ang em? tiin inzawt ta ila; theih loh nachhan tur kan nei lo. Bawngtuthlawh leh Suahdur nen hnatlangin bawlhhlawh kan va thian a; kawngsir hmun remchang lai Rawng te hnawihin kan chei mawi a. A tha em em a ni. Mahse kan chet dan kan thlak loh chuan kan fai seng dawn lo. Hnawk kan siam nasa lutuk a; nakin lawkah hnatlang bawka thenfai leh kan ngai ang.

    Eng thil hi hnawk siam nasa ber kan tih chuan Sahar (Plastic) lam chi hi a ni. He thil hi a sawngbawl a harsa khawp mai. Halral zel dawn ila; mithiam ten Sahar khu hian Ozone Layer a tichhe nasa zual bik an ti bawk si. Bawlhhlawh bawmah paih zel ta ila; a tawihral har em avangin kan la chhiat phah dawn bawk si. Theh thang dan tur a vang hle.

    Tih riral a buaithlak em avang hian Sahar (Polythene) tel lo-a chet zir mai ila a fuh zawk mai thei. Dawr-a thil lei tura kan kal dawn reng rengin Dawrkai te Polythene ring lovin keimahni zawkin a khaina tur Bag keng ta ila. Kuhva leh Sahdah zuar te pawhin Sahar hmang lovin lehkha hmang zawk ta se. Dal leh thil dang Sahar hmanga kan Pack te pawh Lehkha Bawm siamin pack zawk ta ila. Leilung kan chhanhim nasa ang.

    Vawiin atanga ngaihtuahna thar kan hman loh chuan nitina Sahar leh Plastic, Tui Bottle thlengin kan paih hi a tam tial tial dawn si a; a tawih ral mai dawn bawk si lo a; kan ram chu chemical thil in kan tichhe nasa viau-in a rinawm. Tunah pawh hian han hawi vel ila; Sahar leh Plastic hi a tam lutuk mah mah tawh a ni.

    No comments

    Post Top Ad

    Post Bottom Ad