• Breaking News

    Office dang kan mamawh

    Kum 20 chuang zet Civil Sub Division Hqrs kan ni ve ta a; mahse SDO(C) kan neih hian kan duh tawk ta deuh mai emaw ni. Mi thenkhat in Civil Sub Division in a ken tel Office hrang hrang kan sawi lawr a; a nihna takah chuan SDO(C) hian Office dang ken tel a nei lem lo. Inti hre deuhin SDPO te; Treasury te leh thil dang dang te chu Civil Sub Division in a kel tel niin kan ngai a. Kan hre fuh chiah lo deuh a ni.

    Civil Administration hmunah Sub Division kan nih chuan tun aia Office lian deuh zawk hi chu awm tel se a tha ngawt mai. Police Station puitlinga hlankai kan nihna pawh kum tam tak a liam tawh a; Police Station ah chuan Inspector leh Sub Inspector te awm tur a ni a. Mahse Inspector kan nei rei hlei thei lo. Sub Inspector phei chu pahnih khat bak kan nei ngai mang lo a ni.

    Kan SDO(C) Office ah lah chuan SDyM chu sawi loh, Superintendent pawh kan nei lo a; tunah tak phei chuan UDC leh LDC pawh kan nei hek lo. CA pakhat kan nei a; chu lah chu Field Staff ni chungin LDC leh UDC hna zawng zawng khawih lo thei lovin a awm a. Kan changtlung lo tak zet a ni.

    Tun hma deuh khan kan SDO(C) Office ah hian AO pahnih bakah UDC leh LDC kan nei a; khang AO pahnih te kha an kaisang a; UDC pakhat lah kha Kawnpui-a a thawh chhung zawngin a hmel kan hmu ngai lo a; UDC pakhat leh IV Grade hmel kan hmu a; UDC a pension hnu-ah phei chuan a ruak leh zual. Kum kal ta lamah khan LDC pakhat kan neih belh a; mahse chu pawh chu hmun dangah a insawn leh thuai a; midang dah belh a awm chuang lo.

    Kawnpui hi Agriculture leh Horticulture lama eizawng kan ni a; Office lian zawk kan mamawh hle. Dist Horticulture hnuaia Kolasib Circle hnuaiah Vairengte thlengin Circle khatah kan awm a; Bial a zau lutuk a; Deptt an buai a ni. Chutih laiin Bukpui ah khaw tlemte huamin Horticulture Circle a awm a; chu Circle chuan khua a enkawl tam lo. Kawnpui-ah hian Circle thar awm sela; Kolasib Circle zau lutuk a ziaawm phah ang. Mahse beiseina kan la nei lo a ni mai thei. Agriculture lamah pawh AEO kan nei thin a; hmun danga transfer a nih hnu-ah chuan AEO dik tak kan nei leh tawh lo.

    National Highway Sub Division V an rawn awm a; Office neiin SDO (NH) pawh a awm a. Mahse kum tam a liam hma-in chu SDO(NH) chu Aizawl ah sawn chhoh a ni leh daih a. Mipui ten lungawiloh nachang pawh kan hre  lo emaw ni. Kan ngawi mai mai. PHE lamah Rural Watsan enkawltu chu Kolasib-ah a awm a; a awmlohna tur nia ngaih-ah a awm avangin SDO(TC) nen Kolasib Town chhung te an insem mai mai a. Kolasib aiin Kawnpui-a awm tura ngaih a ni a. Sawrkar pawhin thui tak ruahmanna a kalpui tawh. Mahse tunah chuan Kolasib lamah Office a kai tam leh tawh zawk.

    Kan ngaihtuah chiang tawk lo mai mai a ni. SDO(C) Office hmun chungchangah mipui ngaihdan a inang lo a; a awmna hmun kan inchuh titih a; Office dang kan tana pawimawh zawk ngaihven si lovin kan neihsa ah kan inhnial a; a pawi hle. Eng ti zia nge ni ta ngai? Tuna SDO(C) Office thar sakna tur chungchanga buai ai chuan Sawrkar Deptt dang neih belh dan zawn hi a pawimawh zawk lo maw? Kan level a la hniam lutuk nge, kan thu khel a hniam zawk ni ang? A ngaihna kan hre lo em ni? Mahni venga awm tir tum tlatna rilru a len viau chuan hmasawnna thil thar dang neih belh tura hma lak a chakawm loh sawt ang.

    No comments

    Post Top Ad

    Post Bottom Ad