• Breaking News

    Mizote manganna

    Tunlaia Mizo zinga hmathlir thui nei te manganna lian tak chu Mizo zingah Central Service-a inziak tling an awm ta mang lo hi a ni. Vawiin ah hian a pawina kan hre tan chho mek a. Tun atanga kum 10 a lo ral leh phei chuan kan mangang lehzual tawhin a rinawm.

    Mizoram Sawrkar hna lian  Commissioner, Secretary leh Director thawk thei tur an tlem tial tial dawn niin a lang a. District lama Deputy Commissioner tur pawh Mizo in kan daih ta lo niin a lang bawk. Hei hi a chhan chu IAS leh Civil Service danga inziak tling thar kan tlem tak vang a ni. Tuna heng hna sang thawktute hi reilote-ah an pension ang a; anmahni thlak theitu tur Mizo an awm loh chuan Hnam dang in Sawrkar hna sang zawng zawng an chelh ang.

    Chu chauh a ni lo, Mizoten ram leilung fa atana kan pawm theih loh Mizoram chhunga awm ve te zingah Civil Service lama inziak tling thar kan hmuh belh fo a. Heng mite hi nakin lawkah chuan ‘Sir’ tia kan koh a la ngai ngei dawn a. Kan rilru hian pawm lo viau mah ila kan chunga roreltu an nih miau si chuan tihngaihna a awm tawh dawn lo.

    Mizo in IAS kan neih te hi kum 60 hnaih tawh an tam ber a ni. Education Deptt-a Director tur pawhin Vai kan nei ta der mai a. Mizotawng a thiam loh avangin VC leh Zirtirtu tam zawk chuan an harsatna an thlen thei dawn lo tihna a ni a; chu ringawt pawh chu Mizote tan pawi tak a ni thei. DC zingah pawh Vai an awm nual tawh a; Civil Administration thil ah mipui nena indawrna kailawn pawimawh berah pawh kan tawnga kan biak theih loh an awm a ngai tawh a; midang awm tur an awm si lo a ni. Hei hi kan manganna pakhat a la ni zel dawn.

    Kan thiamna (BA leh MA) kan passed na hian IAS tling thei tura cho-na min pe zo lo nge ni ang a; BA leh MA kan nih hnu pawhin kan thiam tawk lo tihna zawk. IAS nih duh lo tumah an awm lo a; mahse IAS tling tura Exam ngam erawh an awm mang lo. Sawrkar hna thawh kan duh a; MPSC Exam kaltlanga hna zawn ngai anih anih chuan kan zuam lo nghal ringawt bawk a. Kan phak tawk nia kan hriat chu Minister leh MLA ten min sawipuina atanga awlsam taka hna hmuh a ni.

    Hetiang ringawt hi chuan hna sang kan thawk ve dawn lo. Mizote chuan kum 35 kan nih thlengin Civil Service kan Exam thei. BA / MA kan passed a, zir zel tumna rilru kan nei ta reng reng lo a; thiam kan tum lo a; Passed ringawt chuan kan duh tawk mai.

    Hnamdang te chuan BA / MA hi thiamna nei tura rahbi (step) ang chauh ah an ngai a; an passed hnu-ah an zir ngawrh sauh thung a. Chutiang an nih avang chuan hna sang takah an lut leh mai thin. Keini hian kan thiam lo bik tihna emaw ni.

    Zirlaite hian IAS nih tum teh se. Mizote manganna kan neih mek lak atang hian min chhanchhuak thei ang.

    No comments

    Post Top Ad

    Post Bottom Ad