• Breaking News

    Mega Food Park hotute leh Save Tuitun Committee inkawm, Industry bawlhhlawh leh Tui thianghlimna sawiho

    Tui thianghlimna sawiho
    Kawnpui Dt. 14th Feb., 2019  : Save Tuitun Committee chuan Tuitun lui kama Zoram Mega Food Park hotute hnenah Tui thianghlim dan tur an sawipui a; mipui ten Tuitun chu tihbawlhhlawh an remti dawn lo a; Tui hna titlem thei zawngin eng thil mah ruahman an duh dawn lo bawk a; khawtlang mipuite rilru hriatsak turin an ngen.

    Thawhlehni tlai khan Save Tuitun Committee hruaitute chuan Zoram Mega Food Park Conference Hall ah  he Industry hotute hi an kawm a. Pu H Lalmuanpuia Vice Chairman in inkawmna a kaihruai. He hun ah hian Save Tuitun Committee chuan Tuitun lui kam ah mi tumah Tuitun lui an kal theih loh nana Fencing siam turin an ngen a. Mihring an kaltlang theih chuan tui a thianghlim tawk lo thei niin an sawi. Food Park hotute chuan an Industry chu Main gate atang lo chuan mihring luh theih loh tura siam turin ruahmanna a awm mek a; Compound Wall siam tura tih a ni tih an lo hrilh a. Tuitun Committee chuan hna hmasa-a nei turin an ngen a ni.

    Hei bakah hian Industry atanga bawlhhlawh chhuak (Industrial Waste) chu Lui luang tana bawlhhlawh lo turin a kalphung ruahman turin an ngen bawk a. Food Park hotute chuan Industry atanga chhuak bawlhhlawh sawngbawl an tum dan an lo hrilhfiah a. Tunah hian bawlhhlawh sawngbawlna hmun chu siam mek anih thu sawiin an siam dan tur ruahmanna chu a lem nen an lo entir nghal a. An ruahmanna siam ah chuan Industry hian Chemical thil a hmang tam dawn lo a; Tuichhia chhuak te pawh a dahkhawlna hmuna dahin hman nawn leh tura thlitfim vek an tum tih sawiin bawlhhlawh tling khawm te pawh a tihro-na khawl hmanga tiro-in Leitha atana hralh chhuah tur anih thu an sawi a. Committee zawhna chhangin Food Park hotute chuan Lui lamah hian eng tui chhia mah a luang lut dawn lo a; khawl hmanga control tum vek a ni an ti. Save Tuitun Committee hruaitute chuan Bawlhhlawh sawngbawl an tum dan Detail Project Report chu mipui in kan hriat theih nan pe chhuak turin an ngen nghal bawk a ni.

    Tuitun tui lak pen chungchang sawiin Lui hnaih lamah Lei verh siam a Underground Water lak chhuah tum chungchang ah Park hotute chuan Lei hnuai lam tui chu lak chhuah tuma hmalak mek a ni a; hmun 3 ah verh tum a ni a, tunah hian hmun 2 ah verh a ni tawh a; hmun khatah chuan tui a awm lo a. Hmun khat ami chu eirawngbawlna turin Plastic Tuizem (2000 litres) dawng ah pump chhuah a ni a. Industry bik a hman tur chu hmun dang a mi, Tuitun tui ni lo Gravity hmanga lak tum a ni an ti a. Committee chuan Underground water lak chhuah anih chuan Lui luang lai (Running Water) a tlem phah an hlauh thawn thu an hrilh a. Industry hotute chuan mithiam te nena Water Level zirchian nisela, Running Water a tih tlem dawn chuan ruahmanna thar dang a siam theih thu an sawi a; Committee chuan Tuitun Pump House thlang lam atangin hman tur chu Pump ve mai tura an duh thu an hrilh tel nghal bawk.

    Hnam dang hnathawka chhawr chungchangah Tuitun Committee chuan Hnamdang te chuan Permit felfai tak an neih vek an duh thu an sawi a. Hnathawka chhawr kan duh chuan an Permit ngaihtuah sak chu a chhawrtu tih tur pawimawh tak a ni tiin an sawipui a ni.

    He huna inkawmna ah hian Zoram Mega Food Park aiawha tel Pu Lalawmpuia Senior Manger chuan an sawihona te chu Board Chairman leh Board Directors te hnenah lo thlen a tum thu a sawi a. Save Tuitun Committee aiawhin Kawnpui Town chhunga VCP 4 te bakah NGO hruaitute an tel a ni.

    No comments

    Post Top Ad

    Post Bottom Ad