• Breaking News

    Man City-in Chelsea an sawp; Aguero - hat-trick hero

    Sergio Aguero chuan Manchester City tan hat-trick a siam leh ta a. City hian Etihad Stadium-ah Chelsea chu si ruk faia sawpin Premier League-ah hmahruaitu an ni leh ta.

    Liverpool chuan Inrinni zan khan Bournemouth hnehin City hi point thumin an lehpel a. Mahse, chiang taka Chelsea hnehin Pep Guardiola naute hian Liverpool chu an lehpel leh a, mahse, an point a inang a, goal difference-a sang zawkin hma an hruai a, chu bakah Liverpool hian khelh khatin an la khel tlem zawk

    Chelsea hi kum 1991 khan Nottingham Forest lakah 7-0 in an chak lo va, khami hnua an chak loh chian ber \um an tawng ta a. Inkhelh \an a\anga minute 4-naah Raheem Sterling chuan chiang mangkhengin goal a rawn khung a. Hemi hnu hian yard 25-a hla a\angin Aguero chuan a rawn pet goal leh nghal zat a. Chelsea keeper Kepa Arrizabalaga a hawihai tluan chhuak a ni ber a. Ross Barkley chuan an lamah awmze nei miah lovin a head a, off-side position-ah awm mah se Aguero chuan dan a bawh chhe lo va, a pet goal leh nghal. Ilkay Gundogan  chuan goal a khung belh leh hnuah, second half-ah Aguero chuan penalty a\angin a goal thumna a khung a, Premier League-ah hat-trick vawi 11 a siamna niin, Alan Shearer-a’n hat-trick siam tam lama Premier League record a siam chu a nihrual ta a. Arsenal leh Chelsea lama hat-trick siam thei Aguero hi a nep thei lo.

    Hemi hnu hian Sterling chuan Chelsea lamah pet goal lehin, 6-0 in Chelsea an chak ta a ni.

    Liverpool chuan City pressure engah mah an ngai lo tih lantirin Bournemouth lakah chiang takin an chak a. Mahse, City chuan awlsam takin champion lallukhum hi an kalsan dawn lo tih lantirin Chelsea chu a sawpin an sawp mai pawh a ni lo, a nawpin an nawp a ni ber a. Liverpool tan Chelsea hi an ngeiawm zawk mah mah maithei.

    Chelsea hi Bournemouth chuan 4-0 in an sawp tawh a. Maurizio Sarri a zak hle tura ngaih a ni a, mahse, City laka an chak loh dan en hian Bournemouth laka an chak loh kha an tihsual satliah niin a lang lo va, Chelsea chhiatzia a lantir chiang hle a tih theih.

    Roman Abramovich chuan nui chungin a en lo ang tih a chiang a. Premier League-a 6-naah a lungawi hauh lo bawk ang. Sarri hmalam hun a thim viau.

    N'Golo Kante-a’n awmzia a nei lo va, City aia Chelsea thlangtu Jorginho pawh engmah lo a ni a. Eden Hazard leh Gonzalo Higuain an che \ha a, mahse, an pahnih chauhvin awmzia an nei si lo.  Chelsea defender Cesar Azpilicueta chuan, “Ka hun tawn tawha zan chhe ber a ni awm e. Sawi ngaihna pawh ka hre lo. Fan-te hnenah ngaihdam ka dil e, chu bak tih theih kan nei lo,” a ti tawp.

    Tottenham an la tel ve zel

    Chawlhni zan Premier League inkhel hmasa zawkah Tottenham chuan 3-1 in Leicester an hneh a, champion inchuhnaah an la tel ve zel a, hmahruaitu City leh Liverpool aiin point 5 chauhvin an hniam.

    Wembley-a inkhelah Davinson Sanchez chuan Spurs tana goal a khungna hmasa ber atan a tauh lut a. Leicester hian an si phurh sutna hun \ha an nei a, mahse, Jamie Vardy chuan penalty a pet goal lo tlat. Vardy pet goal loh a pawi a, Christian Eriksen chuan goal a khung belh a,  Vardy hian goal khat khung belh leh mah se, tun hnaia goal khung thei em em mai Son Heung-min chuan goal a rawn khung belh a, Spurs 3-1 in an chak ta a ni.

    Mauricio Pochettino chuan a player \ha Harry Kene leh Del Alli-te chu a chhawr thei lo naa, a zawnin match 4 an chakna a ni ta a. Game 12 a la awm a, an chunga awmte point 5 chauhvin an thlau a, champion thei lo an ni bik miah lo. Tunah hian Kane leh Alli-te hi an rawn inkhel leh thei \ep tawh a, season tawp lamah champion inchuhna boruak a sang chho viau dawn niin a lang.

    Kum 46-a upa Pochet-tino hian referee-in South Korea player Son chu a dive ti-a card a pek avangin a lawm loh thu a sawi a. “Keini aia fel hi an awm lo vang. Referee bum kan tum ve ngai lo. Referee-te tihsual ka pawm \hin a, ka sawisel ngai lo. Mahse, vawiin thil hi chu a dik lo em a ni,” a ti ve thlawt.

    Spurs hian Nilaini hian Champions League-ah Borussia Dortmund an khel leh dawn a. Dortmund hi Bundesliga hmahruaitu an ni a, Leicester ai chuan an tawh a khirh deuh hlek ngei ang.

    No comments

    Post Top Ad

    Post Bottom Ad